Surxondaryo viloyati Bandixon tumani hokimligi

O‘zbekistonda so‘nggi yillarda amalga oshirilayotgan islohotlar markazida inson qadri, qonun ustuvorligi va xalq manfaatlariga xizmat qiluvchi davlat boshqaruvi tizimini shakllantirish masalasi turibdi. "O‘zbekiston – 2030" strategiyasi aynan shu maqsadlarni izchil amalga oshirishga qaratilgan muhim dasturiy hujjat hisoblanadi.

Mazkur strategiyada, avvalo, mahallalar infratuzilmasini rivojlantirish orqali aholi turmush sharoitini yaxshilashga alohida e’tibor qaratilgan. Jumladan, aholi tashabbuslari va davlat dasturlari doirasida mahallalarga ajratiladigan mablag‘larni 24 trillion so‘mga yetkazish belgilangan. Bu esa fuqarolarning o‘z muammolarini hal etishda bevosita ishtirokini ta’minlab, "xalq davlat idoralariga emas, davlat idoralari xalqqa xizmat qiladi" degan tamoyilni amalda ro‘yobga chiqaradi.

Shu bilan birga, davlat xizmatlarini aholiga yaqinlashtirish maqsadida mahallalarda interaktiv kiosklar orqali ko‘rsatiladigan xizmatlar sonini 1 millionga yetkazish rejalashtirilgan. Bu raqamli transformatsiya jarayonlarini jadallashtirib, ortiqcha qog‘ozbozlik va vaqt sarfini kamaytiradi.

Qonun ustuvorligini ta’minlashda axborot texnologiyalarining o‘rni ham katta. Xususan, milliy arxiv fondi hujjatlarini raqamlashtirish darajasini 60 foizga yetkazish belgilangan bo‘lib, bu tarixiy va huquqiy ma’lumotlarga ochiqlikni ta’minlashga xizmat qiladi.

Mahalliy davlat hokimiyati organlari faoliyatini takomillashtirish ham strategiyaning muhim yo‘nalishlaridan biri hisoblanadi. Xalq deputatlari mahalliy kengashlari faoliyati samaradorligini oshirish maqsadida qonunchilikni bosqichma-bosqich takomillashtirish, shuningdek, ular faoliyatini to‘liq raqamlashtirish orqali shaffoflik va hisobdorlikni ta’minlash ko‘zda tutilgan.

Bundan tashqari, mahalliy ijro hokimiyati organlari faoliyatini transformatsiya qilish orqali "byurokratiya – nol" tamoyilini joriy etish rejalashtirilgan. Bu orqali ortiqcha ma’muriy to‘siqlar bartaraf etilib, fuqarolarga tezkor va samarali xizmat ko‘rsatishga erishiladi.

Xulosa qilib aytganda, "O‘zbekiston – 2030" strategiyasi qonun ustuvorligini ta’minlash, davlat boshqaruvini xalq manfaatlariga yo‘naltirish va zamonaviy raqamli tizimlarni joriy etish orqali demokratik va ochiq jamiyat barpo etishga xizmat qiladi. Bu esa mamlakat taraqqiyotining yangi bosqichini belgilab beradi.

Jinoyat ishlari bo‘yicha

Bandixon tuman sudi

tergov sudyasi                                                                                                                        M.Abdumo‘minov