Bandixonda oilaviy ajrimlar holati muhokama qilindi
2025-11-12 08:00:00 / Yangiliklar
Har bir millatning saodati va izzati shu xalqning ichki intizomi va totuvligiga bogʻliq. Tinchlik va totuvlik esa millat oilalarining intizomiga tayanadi, mamlakat va millat ham shuncha kuchli boʻladi. Agarda bir mamlakatning aholisi axloqsiz va johillik bilan oilaviy munosabatlarni zaiflashtirib yuborsa va intizomsizlikka yoʻl qoʻysa shunda bu millatning saodati va hayoti shubha ostida qoladiAbdurauf Fitrat
Insoniyat tarixida oila har bir shaxs hayotida hal qiluvchi o'rinni egallagan. Uning mustahkamligi jamiyat mustahkamligining garovidir.
Bugun Bandixon tumani hokimligida tuman hokimi A.Allamuradov boshchiligida tuman prokurori B.Toshpulatov, tuman IIB boshlig'i J.To'rayev, tuman oila va xotin-qizlar bo'limi, nuroniylar bo'limi, tuman bosh imomi, FHDYO bo'limi hamda hamkor tashkilotlar ishtirokida tumanda oilalar mustahkamligini ta'minlash va oilaviy ajrimlar sonini kamaytirish masalalari muhokama qilindi.
Bunda erta nikohning oldini olish, ota-onalar oilada shaxslararo munosabatlarni to‘g‘ri yo‘lga qo‘yish, mustahkam oilani barpo etish hamda oilada sog‘lom muhitni yaratish uchun zarur bilimlarni o‘z farzandlariga yetarli darajada o‘rgatmayotganligi tanqid qilindi. Bundan tashqari dabdabali to‘ylar, ortiqcha sarf-xarajatli marosimlarni ixchamlashtirish va oilaviy qadriyatlarni mustahkamlashga qaratilgan “Maromiylik” loyihasini amalda tatbiq etish masalalari muhokama qilindi.
Mas'ullarga har bir mahallada, ko'chada yoshi ulug' nuroniy otaxon va onaxonlar tomonidan ushbu muammoli masalalarni targ'ib qilib, oilaviy ajrimlar sonini kamaytirish bo'yicha ko'rsatmalar berildi va tegishli chora-tadbirlar belgilab olindi.
Bandixon tumani hokimligi
Axborot xizmati