Toshkent viloyati Angren shahar hokimligi

Angrenda gipsokarton uchun qoplama qog‘oz ishlab chiqarish zavodi qurilishi boshlandi

Bugun  Angren shahrida yangi sanoat loyihasining tamal toshi qo‘yildi.

Toshkent viloyati, Angren shahri, “8-Mart” MFY, Ohangaron ko‘chasida gipsokarton uchun qoplama qog‘oz ishlab chiqarish zavodining qurilishi boshlandi. Shu munosabat bilan yangi ishlab chiqarish korxonasining tamal toshini qo‘yish marosimi o‘tkazildi.

Tadbirda Angren shahar hokimi Alisher Rayimov ishtirok etib, so‘zga chiqdi.

O‘z nutqida shahar hokimi Angrenning sanoat ishlab chiqarish salohiyati, hududga xorijiy investitsiyalarni jalb etish borasida yaratilayotgan imkoniyatlar hamda buning uchun zarur shart-sharoitlar mavjudligiga alohida to‘xtalib o‘tdi.

Shuningdek, Alisher Rayimov bunday yirik va istiqbolli loyihalarning amalga oshirilishi Angren shahrining sanoat salohiyatini yanada oshirish, yangi ishlab chiqarish quvvatlarini yaratish va hudud iqtisodiy rivojiga xizmat qilishini ta’kidladi.

Tadbir davomida yangi loyiha shahar hokimligi tomonidan qo‘llab-quvvatlanishi, uning muvaffaqiyatli amalga oshirilishi uchun zarur shart-sharoitlarni yaratishga alohida e’tibor qaratilishi qayd etildi.

Yangi zavod qurilishining boshlanishi Angrenda sanoatni rivojlantirish, investitsiya loyihalarini kengaytirish hamda yangi ishlab chiqarish yo‘nalishlarini yo‘lga qo‘yish borasidagi muhim qadamlardan biridir.

 Tadbirga taklif etilgan Angren shahar "Nuroniy" jamg‘armasi Kengashi faollari duoga qo‘l ochdilar va ezgu tilaklar bildirdilar. Tadbir davomida yangi loyihani qurishga start berildi va tamal toshi qo‘yildi.

Mazkur loyiha DM Paper MChJ tomonidan amalga oshirilmoqda. Yangi korxonaning loyiha quvvati sutkasiga 250 tonna mahsulot ishlab chiqarishga mo‘ljallangan.

Zavodda gipsokarton ishlab chiqarishda foydalaniladigan qoplama qog‘ozini ishlab chiqarish yo‘lga qo‘yiladi. Loyihaning amalga oshirilishi hududda sanoat ishlab chiqarish hajmini oshirish, mahalliy ishlab chiqarish imkoniyatlarini kengaytirish hamda qurilish materiallari sanoatini rivojlantirishga xizmat qiladi.

Loyihachi — Shandong Ludao Energy Technology Co., Ltd. Korxona qurilishining boshlanishi munosabati bilan tashkil etilgan tadbirda yangi ishlab chiqarish majmuasining loyiha ko‘rinishi, ishlab chiqarish jarayonlari hamda texnologik imkoniyatlari e”trof etildi.

Ta’kidlash joizki, Angren shahrida yangi sanoat korxonalarining tashkil etilishi hududning ishlab chiqarish salohiyatini yanada oshirish va zamonaviy texnologiyalarni joriy etish uchun muhim ahamiyat kasb etadi.

Yangi zavodning bunyod etilishi Angren shahrining sanoat salohiyatini yanada yuksaltirish yo‘lidagi navbatdagi muhim qadamlardan biridir.

Angren shahar hokimligi Axborot xizmati