Toşkent viloyati Angren şahar hokimligi

#hamkorlik

Angrenda ekologik tadbirkorlikni qo‘llab-quvvatlash masalalari muhokama qilindi

Bugun Angren shahar hokimi Alisher Rayimov BMT vakillari bilan yuzma-yuz muloqot o‘tkazdi.

Uchrashuvda ekologik tadbirkorlikni qo‘llab-quvvatlashga qaratilgan o‘quv dasturi hamda biznes-loyihalarni amalga oshirish masalalari muhokama qilindi.

Ta’kidlanganidek, aylanma iqtisodiyotni rivojlantirish va chiqindilarni boshqarish sohasidagi qo‘shma loyiha BMT Taraqqiyot dasturi (UNDP) tomonidan O‘zbekiston Respublikasi Chiqindilarni boshqarish va sirkular iqtisodiyotni rivojlantirish agentligi bilan hamkorlikda amalga oshirilmoqda.

Loyiha doirasida tadbirkorlik faoliyatini boshlash istagida bo‘lgan hamda amalda faoliyat yuritayotgan tadbirkorlar uchun maxsus o‘quv-treninglar tashkil etiladi.

Mashg‘ulotlar mutlaqo bepul bo‘lib, o‘quv jarayoni bilan bog‘liq barcha xarajatlar loyiha hisobidan qoplanadi.

Qayd etilganidek, mazkur treninglar Angren shahrida ham o‘tkazilib, unda yangi biznes boshlayotgan va faoliyat yuritayotgan tadbirkorlar ishtirok etish imkoniyatiga ega bo‘ladilar.

Uchrashuvda ekologik yo‘nalishdagi biznes-tashabbuslarni qo‘llab-quvvatlash, chiqindilarni qayta ishlash va resurslardan samarali foydalanish, shuningdek, aylanma iqtisodiyot tamoyillarini amaliyotga keng joriy etish bo‘yicha hamkorlikni yanada rivojlantirish yuzasidan fikr almashildi.

Yuzma-yuz muloqotlarda shahar hokimining birinchi o‘rinbosari Yashin Naraliyev, hokimning raqamlashtirish va sun’iy intelekt masalalari bo‘yicha maslahatchisi Behzod Mirzaboyev qatnashdilar.

✍️ Angren shahar hokimligi Axborot xizmati