#Murojaat Angren shahar prokurori Allayor Xayriddinovning shahar aholisiga Murojaati
2026-07-01 09:10:00 / Rahbariyatning bayonotlari va nutqlari
Bugungi kunda jamiyat tinchligi va osoyishtaligini ta’minlash, jinoyatchilik hamda turli huquqbuzarliklarning oldini olish har birimizdan yuksak mas’uliyat, ogohlik va fuqarolik pozitsiyasini talab etadi.
#Murojaat
Angren shahar prokurori Allayor Xayriddinovning shahar aholisiga Murojaati
Hurmatli Angren shahri aholisi!
Bugungi kunda jamiyat tinchligi va osoyishtaligini ta’minlash, jinoyatchilik hamda turli huquqbuzarliklarning oldini olish har birimizdan yuksak mas’uliyat, ogohlik va fuqarolik pozitsiyasini talab etadi.
Shu bois, Angren shahar prokuraturasi tomonidan huquq-tartibotni mustahkamlash, aholi xavfsizligini ta’minlash hamda jinoyatchilikka qarshi kurashish borasida tizimli ishlar amalga oshirilmoqda.
Aziz fuqarolar!
Ayrim holatlarda insonlarning ishonuvchanligi, beparvoligi yoki huquqiy savodxonlikning yetarli emasligi turli noqonuniy xatti-harakatlarga sabab bo‘lmoqda. Xususan, internet tarmoqlari orqali sodir etilayotgan firibgarlik holatlari, giyohvandlik vositalari tarqatilishi, yoshlar o‘rtasidagi turli salbiy illatlar, oilaviy nizolar, maishiy janjallar va boshqa huquqbuzarliklar jamiyat xavfsizligiga jiddiy tahdid solmoqda.
Shu munosabat bilan barcha fuqarolarni ogoh va hushyor bo‘lishga chaqiraman.
Noma’lum shaxslarga bank kartasi ma’lumotlari, tasdiqlash kodlari va shaxsiy ma’lumotlarni bermaslik, shubhali havolalarga kirmaslik, internet orqali tez boyish yoki yengil daromad va’da qiluvchi takliflarga ishonmaslik lozim. Fuqarolar o‘z mol-mulki, farzandlari tarbiyasi va oila tinchligiga befarq bo‘lmasliklari zarur.
Ayniqsa, yoshlar tarbiyasi masalasiga alohida e’tibor qaratish talab etiladi. Farzandlarimizning bo‘sh vaqtlarini mazmunli tashkil etish, ularning internet tarmoqlaridan foydalanishini nazorat qilish, turli yot g‘oyalar va salbiy ta’sirlardan asrash — har bir ota-onaning muqaddas burchidir.
Shuningdek, mahalla faollari, nuroniylar, ta’lim muassasalari va keng jamoatchilik vakillarini huquqbuzarliklarning oldini olishda hamkorlikni yanada kuchaytirishga chaqiraman.
Zero, jinoyatchilikka qarshi kurashish faqat huquqni muhofaza qiluvchi organlarning emas, balki butun jamiyatning umumiy vazifasidir.
Hurmatli hamshaharlar!
Agar Sizga ma’lum bo‘lgan huquqbuzarlik yoki jinoyat holatlari mavjud bo‘lsa, bunga befarq bo‘lmang. Qonunbuzilish holatlari haqida tegishli idoralarga zudlik bilan xabar bering. Faqatgina hamjihatlik, o‘zaro hurmat va qonunga itoat qilish orqali yurtimizda tinchlik va osoyishtalikni ta’minlay olamiz.
Qonuniylik va adolat ustuvor bo‘lgan jamiyatni barpo etish yo‘lida barchangizni faollikka, ogohlikka va mas’uliyatli bo‘lishga chaqiraman.
Angren shahar prokurori Allayor Xayriddinov.
✍️ Angren shahar hokimligi Axborot xizmati