Toshkent viloyati Angren shahar hokimligi

14-yanvar — Vatan himoyachilari kuni munosabati bilan Angren shahar hokimi Rayimov Alisher Abdumalikovichning nutqi Hurmatli hamshaharlar, harbiy xizmatchilar, qadrli yurtdoshlar! Avvalo, sizlarni “O’zbekiston Respublikasi Qurolli Kuchlari tashkil etilganligining 34-yilligi” hamda “Milliy armiya-Ona yurt qalqoni, tinchligimiz posboni!” shiori ostida keng nishonlanayotgan 14-yanvar — Vatan himoyachilari kuni bilan chin qalbimdan tabriklayman. “Bugungi kunda barchamiz — qaysi soha, qanday lavozimda ishlamaylik, Vatan himoyachisi bo‘lishimiz zarur. Bu talabni davrning o‘zi oldimizga qat’iy vazifa qilib qo‘ymoqda va xalqimiz ham bizdan aynan shuni kutmoqda”. “Barchamiz uchun shon-sharaf timsoliga aylangan mana shu qutlug‘ ayyomda o‘z hayotini Vatan himoyasidek ulug‘ ishga bag‘ishlagan botir va dovyurak o‘g‘lonlarimizni, muhtaram faxriylarimizni tabriklab, ularning sha’niga eng ezgu tilaklarimizni izhor etamiz. Sizlarning azmu shijoatingiz, el-yurtga sadoqatingiz tufayli xalqimizning tinch va osoyishta hayoti ta’minlanmoqda. “Yurtimiz bo‘ylab jasorat madhiyalari yangrayotgan bugungi ulug‘ kunlarda Vatan oldidagi burchini ado etish chog‘ida halok bo‘lgan qahramon harbiylarimizning so‘nmas xotirasi oldida barchamiz hurmat bajo keltiramiz. Fursatdan foydalanib, mard va bahodir yurt posbonlarini tarbiyalagan barcha ota-onalarga, harbiy xizmat davomida vatan himoyachilariga tog‘dek tayanch bo‘lib kelayotgan ularning oila a’zolariga chin qalbimdan minnatdorlik bildiraman”. Muhtaram Prezidentimiz rahnamoligida Qurolli Kuchlarimiz har tomonlama zamonaviylashib, jangovar salohiyati yildan-yilga mustahkamlanib bormoqda. Harbiy xizmatchilarimizning ijtimoiy himoyasi, yashash sharoitlari, harbiy ta’lim va tayyorgarlik masalalariga alohida e’tibor qaratilmoqda. Bu esa sizlarning sharafli va mas’uliyatli burchingizni yanada munosib ado etishingizga mustahkam zamin yaratmoqda. Bugungi bayram munosabati bilan Vatan himoyasi yo‘lida halok bo‘lgan qahramonlarimiz xotirasini chuqur hurmat bilan yod etamiz. Ularning jasorati va fidoyiligi bugungi va kelajak avlod uchun ibrat maktabi bo‘lib qoladi. “Ona yurt qalqonlari, tinchlik posbonlari sharaflanadigan mana shu quvonchli kunda siz, azizlarni shonli bayramingiz bilan yana bir bor chin dildan qutlayman. Barchangizga muqaddas qasamyodingizga sodiq qolib, xizmat burchingizni yuksak darajada ado etishda mustahkam sog‘liq, ulkan muvaffaqiyatlar, oilaviy baxt, xonadonlaringizga tinchlik, fayzu baraka tilayman. Jonajon vatanimiz himoyasi yo‘lida hech qachon tolmang, yutuq va zafarlar doimo sizlarga yor bo‘lsin!” Yana bir bor bayramingiz muborak bo‘lsin!