"Mahalla ettiligi" tavsiyasi asosida uy-joy sharoitini yaxshilashga muhtoj bo‘lgan shaxslarga ipoteka kreditini ajratish tartibi
«Mahalla ettiligi» — mahalla fuqarolari yigini raisi, hokim yordamchisi, yoshlar etakchisi, xotin-qizlar faoli, profilaktika inspektori, ijtimoiy xodim, soliq inspektoridan iborat jamoa.
«Mahalla ettiligi» tavsiyasi — Dasturga kiritilgan va uy-joy sharoitini yaxshilashga muhtoj bo‘lgan shaxsning ijtimoiy shart-sharoitini o‘rganishdan so‘ng unga yakka tartibdagi uy-joyni qurish, rekonstruktsiya qilish, ta’mirlash uchun ipoteka kreditini ajratish maqsadga muvofiqligini ifodalovchi «mahalla ettiligi» tomonidan imzolanadigan hujjat.
Qarorga ko‘ra, quyidagilar belgilandi:
- yakka tartibdagi uy-joyni qurish, rekonstruktsiya qilish va ta’mirlash maqsadlari uchun asosiy stavkadan 4 foiz bandga yuqori stavkada 120 million so‘mgacha miqdorda, 20 yilgacha muddatga ipoteka kreditlarini ajratish;
- ipoteka krediti bo‘yicha dastlabki badalning bir qismini qoplash uchun ajratiladigan kreditning 15 foizi miqdorida hamda foiz to‘lovlarining bir qismini qoplash uchun kredit muddatining birinchi 5 yili davomida 12 foizdan oshgan qismiga subsidiya to‘lab berish;
- ipoteka kreditlari va ular bo‘yicha subsidiyalarni rasmiylashtirish hamda ajratish tartibi.
Ushbu ipoteka kreditini olish mumkin bo‘lgan shaxslar online-mahalla.uz platformasi orqali ariza yuborishlari mumkin.
Shuningdek:
- kambag‘allikdan chiqarish dasturiga kiritilgan va uy-joy sharoitini yaxshilashga muhtoj bo‘lgan shaxslarga yakka tartibdagi uy-joyni qurish, rekonstruktsiya qilish va ta’mirlashda kadastr pasportini rasmiylashtirish va ko‘chmas mulkka bo‘lgan huquqlarni davlat ro‘yxatidan o‘tkazish bilan bog‘liq to‘lovlar qiymati 50 foizga kamaytiriladi;
- yakka tartibdagi uy-joyni qurish, rekonstruktsiya qilish va ta’mirlash uchun ajratilgan ipoteka kreditlari bo‘yicha dastlabki badal va foiz xarajatlarining bir qismini qoplash uchun subsidiyalar "subsidyplatform.mf.uz" to‘lov platformasi orqali ajratiladi.