Xorijda ishlayotgan fuqarolarini va ularning oila a’zolarini qo‘llab-quvvatlash
“Xorijda vaqtincha mehnat faoliyatini amalga oshirayotgan O‘zbekiston Respublikasi fuqarolarini va ularning oila a’zolarini qo‘llab-quvvatlash bo‘yicha qo‘shimcha chora-tadbirlar to‘g‘risida”gi Prezident qarori (PQ–149-son, 01.03.2022-y.)
- 2022-yil 1-iyundan Rossiya Federatsiyasi, Turkiya hamda Qozog‘istonning tegishli hududlarida (12 ta) Bandlik va mehnat munosabatlari vazirligi huzuridagi Tashqi mehnat migratsiyasi agentligining vakillik instituti joriy qilinadi.
Har yili hokim yordamchilari yozma tavsiyanomasiga asosan:
- boquvchisi xorijga mehnat migratsiyasiga chiqib ketgan va «Ijtimoiy himoya yagona reestri» axborot tizimida ro‘yxatda bo‘lgan yoki «Kambag‘al oilalar reestri» axborot moduliga kiritilgan oilalarga bazaviy hisoblash miqdorining 2 baravari miqdorida bir martalik moddiy yordam ko‘rsatish;
- mehnat migratsiyasiga chiqib ketgan fuqarolarning «Ijtimoiy himoya yagona reestri» axborot tizimida ro‘yxatda bo‘lgan yoki «Kambag‘al oilalar reestri» axborot moduliga kiritilgan yoxud «Temir daftar», «Ayollar daftari» va «Yoshlar daftari»dan biriga kiritilgan, nogironligi bo‘lgan oila a’zolariga dori-darmon, nogironlik aravachalari, eshitish apparatlari va ortopedik mahsulotlar xarid qilish uchun bazaviy hisoblash miqdorining 5 baravari miqdorida bir martalik moddiy yordam ko‘rsatish;
- mehnat migratsiyasiga chiqib ketgan fuqarolarning O‘zbekistonda ular bilan birga yashovchi pensiya yoshiga etgan yoki I va II guruh nogironligi bo‘lgan oila a’zolariga kasaba uyushmalari tizimidagi sanatoriy va profilaktik davolanish muassasalariga bir martalik bepul yo‘llanma beriladi.
- Shuningdek, mahallalardagi yoshlar etakchilarining yozma tavsiyanomasiga asosan «Ijtimoiy himoya yagona reestri» axborot tizimida ro‘yxatda bo‘lgan yoki «Kambag‘al oilalar reestri» axborot moduliga kiritilgan yoxud «Temir daftar», «Ayollar daftari» va «Yoshlar daftari»dan biriga kiritilgan hamda mehnat migratsiyasiga chiqib ketgan fuqarolarning bolalariga mavsumiy faoliyat yuritadigan oromgohlarga bepul yo‘llanmalar berish to‘g‘risidagi tashabbusi qo‘llab-quvvatlansin.
O‘zbekiston kasaba uyushmalari Federatsiyasining mablag‘lari hisobidan mehnat migratsiyasiga chiqib ketgan fuqarolarning oila a’zolariga yordam pullari va yo‘llanmalar berishda:
- yordam pullari va yo‘llanmalarni olish uchun talabgorlar Bandlik va mehnat munosabatlari vazirligiga «Labor migration» dasturiy majmuasi orqali elektron tarzda murojaat qiladi;
- talabgorlar Bandlik va mehnat munosabatlari vazirligiga “Labor migration” dasturiy majmuasi orqali elektron murojaat qiladi.
Xorijda vaqtinchalik ishlayotgan va ta’lim olayotgan o‘zbekistonlik yoshlarni qo‘llab-quvvatlash maqsadida “Xorijdagi yoshlar balansi” shakllantirilib, ular to‘g‘risidagi ma’lumotlar “Yoshlar portali” elektron platformasiga kiritib boriladi.
2022-yil 1-martdan “daftarlar”dan biriga kiritilgan va tashkillashtirilgan mehnat migratsiyasi yo‘li bilan vaqtinchalik ishlash uchun xorijga chiqib ketayotgan fuqarolarga ham 10 million so‘mgacha miqdorda bir yil muddatga miqroqarzlar beriladi.
Shuningdek, 2023-yil 1 yanvargacha quyidagilar bo‘yicha kompensatsiyalar to‘lanadi:
- xorijiy tillar va (yoki) kasb bo‘yicha malaka imtihonlarini topshirish bilan bog‘liq xarajatlarini qoplash uchun, basharti ular muvaffaqiyatli topshirilganda — BHMning 3 baravari miqdorida;
- yo‘l chiptasini xarid qilish bo‘yicha – BHMning 2 baravari miqdorida;
- “ishchi viza”ni rasmiylashtirish bo‘yicha – BHMning 5 baravari miqdorida.