Avtomototransport vositasini boshqarish huquqini boshqa shaxsga berish
O‘zbekiston Respublikasi Vazirlar Mahkamasining 20.11.2023-yildagi 613-son qaroriga binoan ishonchnoma quyidagi holatlarda bekor qilingan hisoblanadi:
— ishonchnomaning amal qilish muddati tugaganda;
— ishonchnomani bergan shaxs tomonidan bekor qilinganda;
— ishonchnoma rasmiylashtirilgan vaqtdan so‘ng ishonchnomani bergan shaxs muomalaga layoqatsiz, muomala layoqati cheklangan yoki bedarak yo‘qolgan deb topilganda yoxud u vafot etganda;
— ishonchnoma berilgan shaxs(lar) muomalaga layoqatsiz, muomalaga layoqati cheklangan yoki bedarak yo‘qolgan deb topilganda yoxud u vafot etganda;
— avtomototransport vositasining mulkdori o‘zgarganda.
Ishonchnoma uni bergan shaxs tomonidan istalgan vaqtda bekor qilinishi mumkin.
Ishonchnomani uni bergan shaxs tomonidan amal qilishi muddatidan oldin bekor qilinganda yoki takroriy ishonchnoma rasmiylashtirilganda to‘langan davlat boji qaytarilmaydi.
Ishonchnomani bekor qilish uchun to‘lov talab etilmaydi.
Ishonchnoma bekor qilinganligi to‘g‘risidagi ma’lumot «Notarius» AATda qayd qilinadi va O‘zbekiston Respublikasi Ichki ishlar vazirligining «Yagona avtomatlashtirilgan axborot tizimi»ga elektron shaklda yuboriladi.
Bekor qilingan ishonchnomalar haqidagi ma’lumotlar «Notarius» AATda yuritiladigan ishonchnomalarning alohida reestriga kiritiladi.
Ishonchnoma bekor qilinganda, ariza beruvchining YaIDXPdagi shaxsiy kabinetiga va ishonchnoma berilgan shaxs(lar)ning YaIDXPdagi shaxsiy kabinetiga (mavjud bo‘lganda) xabarnoma yuboriladi.
Ishonchnoma shakllantirilganda yoki bekor qilinganda, O‘zbekiston Respublikasi Ichki ishlar vazirligining «Yagona avtomatlashtirilgan axborot tizimi»da avtomototransport vositasini hisobga olish ma’lumotlariga (ishonchnomaning raqami, boshqarish huquqiga ega shaxs(lar)ning ma’lumotlari, amal qilish muddati, bekor bo‘lishi kabi) avtomatik tarzda o‘zgartirish va qo‘shimchalar kiritiladi.