Avtotransportni ro‘yxatdan o‘tkazish va davlat raqami olish

---

Avtotransport vositasining oldi-sotdi (hadya qilish, ayirboshlash) shartnomasi notarial tartibda tasdiqlangandan so‘ng ushbu avtotransport vositasi 10 kun ichida egasining doimiy yashash joyidagi Yo‘l harakati xavfsizligi davlat xizmatida (YHXDX) ro‘yxatdan o‘tkazilishi va ro‘yxatdan o‘tkazish davlat raqami belgisi (RO‘DRB) olinishi lozim.

Avtomototransport vositalarini davlat ro‘yxatidan o‘tkazish hududiy DYHXX organlari tomondan quyidagi holatlarda amalga oshiriladi:

a) YHXX va uning hududiy boshqarmalarida ro‘yxatdan o‘tkazilmagan yangi avtomototransport vositasi olinganda;
b) O‘zbekiston Respublikasi bojxona hududiga kiritilgan avtomototransport vositalari va ular tirkamalari va yarim tirkamalarining erkin muomalaga chiqarish (import) bojxona rejimida bojxona ro‘yxatidan o‘tkazishda;
v) ilgari YHXX va uning hududiy boshqarmalarida ro‘yxatdan o‘tgan avtomototransport vositasining egasi o‘zgarganda;
g) avtomototransport vositasining ro‘yxatdan o‘tgan joyini o‘zgartirishni talab qiluvchi, avtomototransport vositasi egasining yashash (turar) joyi yoki joylashgan joyi (pochta manzili) o‘zgargan holatlarda.

Avtomototransport vositasi uning egasining — jismoniy yoki yuridik shaxsning nomiga davlat ro‘yxatidan o‘tkaziladi.

Jismoniy shaxslarning avtomototransport vositalari ularning doimiy ro‘yxatga olingan joyi bo‘yicha, doimiy ro‘yxatga olingan joyi bo‘lmasa — vaqtincha turgan joyi bo‘yicha davlat ro‘yxatidan o‘tkaziladi.

O‘zbekiston Respublikasi Ichki ishlar vazirining buyrug‘i, 31.03.2024-yilda ro‘yxatdan o‘tgan, ro‘yxat raqami 2303-5 ko‘ra, 1 apreldan elektromobillar, mototransport vositalari va tirkamalarni ro‘yxatdan o‘tkazish va qayta ro‘yxatdan o‘tkazish uchun to‘lovlar stavkasi 15 baravarga — 1,5 BHMgacha oshirildi. Qolgan barcha avtomobillar bo‘yicha stavka 68,4 baravarga oshib, 6,84 BHM tashkil etadi.