Bolalar bog‘chasiga imtiyozli navbat kimlarga taqdim etiladi?
Bugungi kunda, maktabgacha ta’lim muassasalariga farzandlarini joylashtirish maqsadida, ota onalar yoki ularning o‘rnini bosuvchi shaxslar o‘zlari yashayotgan hududdagi yagona davlat interaktiv xizmatlari markazlariga borib ariza asosida murojaat qilishlari kerak bo‘ladi. Sababi, bolalarni o‘zlari yashaydigan hududdagi bog‘chalarga joylashtirish uchun yagona davlat interaktiv xizmatlari markazlari orqali navbatga qo‘yish amaliyoti joriy qilingan. Shuningdek, Bolalarni maktabgacha ta’lim muassasalariga joylashtirish bo‘yicha, ariza onlayn shaklda ham berilishi mumkin. Bu jarayonda ota onalar quyidagi ishlarni amalga oshirishadi:
1. Arizachi YIDXPda ro‘yxatdan o‘tadi, ariza shaklini to‘ldiradi va vakolatli organga yuboradi.
2. Vakolatli organ bolani bog‘chaga navbatga joylashtirish haqida xabarnoma yuboradi.
3. Bola 3 yoshga to‘lgach hamda tegishli navbat kelgandan so‘ng yo‘llanma shakllanadi va YIDXP orqali arizachiga yuboriladi.
O‘z navbatida, ta’kidlab o‘tish kerakki, farzandlarini maktabgacha ta’lim muassasalariga joylashtirishga navbatga qo‘yish bo‘yicha, ayrim toifadagi shaxslarga imtiyozlar taqdim etiladi.
Vazirlar Mahkamasining 20.05.2021-yildagi 319-son «Bolalarni davlat maktabgacha ta’lim muassasalariga qabul qilish bo‘yicha davlat xizmatlari ko‘rsatishning ma’muriy reglamentini tasdiqlash to‘g‘risida»gi qaroriga asosan, quyidagi toifadagi shaxslarga bu borada imtiyozlar taqdim etiladi:
⇒ I va II guruh nogironligi bo‘lgan shaxslarning bolalari;
⇒ ko‘p bolali oilalarning bolalari;
⇒ etim bolalar yoki ota-onasining qarovisiz qolgan bolalar;
⇒ «Ayollar daftari»ga kiritilgan ijtimoiy himoyaga muhtoj yolg‘iz ayollarning farzandlari;
⇒ kontrakt bo‘yicha harbiy xizmatchilarning va ichki ishlar organlari xodimlarining bolalari;
⇒ talabalar va pedagoglarning bolalari;
⇒ akalari yoki opalari ushbu muassasaning tarbiyalanuvchilari jumlasidan bo‘lgan bolalar;
⇒ ko‘p tarmoqli ixtisoslashtirilgan maktabgacha tashkilotlardan umumiy turdagi maktabgacha tashkilotlarga o‘tkazilayotgan sog‘aygan bolalar.
Bunda imtiyozli ro‘yxatga kiritilgan bolalarga ilgari taqdim etilgan imtiyozlar ularga yo‘llanma berilgunga qadar saqlanib turadi.
Imtiyozli ro‘yxat bo‘yicha bolalarni qabul qilish davlat-xususiy sheriklikka asoslangan nodavlat maktabgacha ta’lim muassasalariga tatbiq etilmaydi.
Joriy yilning 31-mayiga qadar 7 yoshga to‘ladigan bolalarning so‘rovnomalari ushbu sanada bekor qilinadi hamda avtomatik ravishda navbatdan chiqariladi.