Jarima to‘laymanmi?

– Pasportimning amal qilish muddati 17 kun o‘tib ketibdi. ID karta olishimda pasportimning muddati o‘tib ketgani uchun jarima to‘laymanmi?

– 2011-yil 5-yanvardagi “O‘zbekiston Respublikasida pasport tizimini takomillashtirishga doir qo‘shimcha chora-tadbirlar to‘g‘risida”gi Prezident farmoni bilan tasdiqlangan “O‘zbekiston Respublikasi fuqarosining biometrik pasporti to‘g‘risida”gi Nizomga ko‘ra, fuqaro pasportining amal qilish muddati tugagandan so‘ng yoki familiyasi, ismi, otasining ismi, tug‘ilgan yili va millati o‘zgargandan so‘ng pasportini bir oy muddatda ID-kartaga almashtirishi lozimligi ta’kidlangan. Sizda pasportingiz muddati tugaganidan keyin uni ID kartaga almashtirish bo‘yicha bir oy muddat mavjud. Ichki ishlar organlarining migratsiya va fuqarolikni rasmiylashtirish bo‘linmalariga ID karta olish uchun murojaat qiling.

O‘zbekiston Respublikasi Ma’muriy javobgarlik to‘g‘risidagi Kodeksga ko‘ra, o‘n sakkiz yoshgacha bo‘lgan O‘zbekiston Respublikasi fuqarosi o‘n olti yoshga to‘lishi munosabati bilan identifikatsiyalovchi ID-kartasini o‘z vaqtida olmaganligi uchun ma’muriy javobgarlikka tortilmaydi.

O‘n sakkiz yoshgacha bo‘lgan, O‘zbekiston Respublikasida doimiy yashayotgan chet el fuqarosi va fuqaroligi bo‘lmagan shaxs o‘n olti yoshga to‘lishi munosabati bilan identifikatsiyalovchi ID-kartasini o‘z vaqtida olmaganligi uchun ma’muriy javobgarlikka tortilmaydi.