Chet el fuqarolari uchun yashash guvohnomalari

Yashash guvohnomasi - Yashash guvohnomasi unda ko‘rsatilgan amal qilish muddati tugagunga qadar, 60 yoshga to‘lgandan keyin olingan yashash guvohnomasi esa 2030-yil 31 dekabrgacha chet el fuqarosi va fuqaroligi bo‘lmagan shaxsning identifikatsiyalovchi ID-kartasi bilan bir qatorda chet el fuqarosi va fuqaroligi bo‘lmagan shaxsning O‘zbekiston Respublikasida doimiy yashash huquqini tasdiqlovchi hujjat hisoblanadi. 

O‘zbekiston Respublikasi hududida doimiy yashab turgan, O‘zbekiston Respublikasining fuqarosi bo‘lmagan va o‘zining chet el fuqaroligiga mansubligiga doir dalilga ega bo‘lmagan shaxs uchun yashash guvohnomasi qo‘shimcha ravishda uning shaxsini tasdiqlovchi hamda fuqaroligi bo‘lmagan shaxsning huquqiy maqomini belgilab beruvchi hujjat hisoblanadi. Yashash guvohnomasi O‘zbekiston Respublikasi doirasida haqiqiydir.

Yashash guvohnomasi ichki ishlar organlari tomonidan davlat, rus, ingliz tillarida to‘ldirilgan hamda unga quyidagi ma’lumotlar kiritilgan:

• familiyasi, ismi, otasining ismi;
• tug‘ilgan yili, kuni, oyi;
• tug‘ilgan joyi;
• millati;
• O‘zbekiston Respublikasiga kelgan kunidagi fuqaroligi;
• oilaviy ahvoli;
• O‘zbekiston Respublikasiga kelgan kuni;
• kelishdan maqsad;
• yashash guvohnomasi kim tomonidan va qachon berilgan;
• yashash guvohnomasi qanday hujjatlarga asoslanib berilgan;
• yashash guvohnomasining amal qilish muddati va amal qilish muddatining uzaytirilganligi;
• voyaga etmagan farzandlari haqida;
• doimiy yashash yoki vaqtincha turgan joyi bo‘yicha hisobga olinganligi haqida;
• alohida belgilar (qon guruhi, rezus mansubligi (faktori) va boshqalar);
• O‘zbekiston Respublikasida yashash guvohnomasiga eslatma.

Jismoniy shaxsning shaxsiy identifikatsiya raqamini olish uchun jismoniy shaxs yashash joyidagi ichki ishlar organlarining migratsiya va fuqarolikni rasmiylashtirish bo‘limiga murojaat qilishi kerak.

Shaxsning roziligi bilan yashash guvohnomasida sog‘liqni saqlash muassasasi tomonidan yashash guvohnomasi egasining qon guruhi va rezus mansubligi (faktori) to‘g‘risidagi belgilar qo‘yiladi.

Yashash guvohnomasiga ushbu Nizomda nazarda tutilmagan yozuvlarni kiritish taqiqlanadi.

Yashash guvohnomalarida kattaligi 35x45 millimetrli qora-oq yoki rangli fotosuratlar, hujjat egasining va uni bergan mas’ul shaxsning imzolari bo‘lishi lozim.