O‘zbekistonda o‘rmonlar va yashil hududlar bilan ishlovchi maxsus agentlik shug‘ullanadi
Agentlik daraxt va buta ko‘chatxonalari tarmog‘ini kengaytirish bilan shug‘ullanadi.
O‘zbekistonda O‘rmonlarni ko‘paytirish va yashil maydonlarni kengaytirish hamda cho‘llanishga qarshi kurashish agentligi tashkil etiladi, deb prezident qarorida aytilgan.
Ma’lumotlarga ko‘ra, agentlik Ekologiya, atrof-muhitni muhofaza qilish va iqlim o‘zgarishi vazirligi huzuridagi O‘rmon xo‘jaligi agentligi negizida tashkil etiladi. Ta’kidlanishicha, agentlik o‘rmonlarning davlat hisobini va o‘rmon kadastrini yuritadi, shuningdek, daraxt va buta ko‘chatxonalari tarmog‘ini kengaytirish bilan shug‘ullanadi.
Bundan tashqari, idora quyidagi vazifalarni bajaradi:
o‘rmonlarni barpo etish, muhofaza qilish, ko‘paytirish, qayta tiklash, ularning mahsuldorligini oshirish va ulardan oqilona foydalanish sohasidagi davlat dasturlarini ishlab chiqish va amalga oshirishda ishtirok etish;
o‘rmon xo‘jaligi sohasini modernizatsiya qilish va diversifikatsiyalash hamda uning barqaror rivojlanishini qo‘llab-quvvatlash uchun investitsiyaviy jozibadorlikni oshirish;
global iqlim o‘zgarishi oqibatlarini yumshatish bo‘yicha chora-tadbirlarni ishlab chiqish va amalga oshirish;
cho‘llanish va erlar degradatsiyasiga qarshi kurashish bo‘yicha faoliyatni muvofiqlashtirish;
manzarali daraxt va butalar urug‘chiligi va etishtirish tizimini rivojlantirish, ko‘chatxonalarda in vitro laboratoriyalarini joriy etish, manzarali o‘simliklar urug‘lari va ko‘chatlarini sertifikatlash va standartlashtirish tizimini yaratish;
raqamli texnologiyalarni, jumladan “Aqlli o‘rmon” tizimini joriy etish;
faoliyat samaradorligini oshirish uchun xalqaro grantlar va boshqa moliyaviy manbalar hisobiga xorijiy maslahatchilar va ekspertlarni jalb etish.
Ta’kidlanishicha, agentlik “Yashil makon” umummilliy loyihasini amalga oshirish bo‘yicha ijro etuvchi hokimiyat organiga aylanadi.
Avvalroq xabar qilinganidek, O‘zbekiston Jahon banki bilan hamkorlikda o‘rmonlar va degradatsiyaga uchragan erlarni tiklaydi. Mamlakat bu maqsad uchun 150 million dollar miqdorida mablag‘ oladi.