Vengriya O‘zbekistonning Markaziy Yevropadagi eng muhim sheriklaridan biri hisoblanadi. Salkam 10 million aholiga ega Vengriya iqtisodiy jihatdan ancha jadal rivojlanayotgan agrar sanoat mamlakatidir. O‘zbek va venger xalqlarini mushtarak tarixiy ildizlar, yaqin hamkorlik rishtalari bog‘lab keladi.

O‘zbekiston va Vengriya oliy hamda yuqori darajalarda doimiy siyosiy muloqotlar olib bormoqda. Ikki davlat rahbarlarining qat’iy siyosiy irodasi, ikki mamlakatning o‘ziga xos o‘xshash jihatlari, Vengriyaning Markaziy Yevropada, O‘zbekistonning Markaziy Osiyoda joylashganligi, shuningdek, Vengriya Yevropa davlatlari uchun O‘zbekistonga, o‘z navbatida, O‘zbekiston Vengriya uchun Markaziy Osiyo mamlakatlari bozoriga ko‘prik vazifasini bajarish istiqbollari hamkorlikni yangi yutuqlar bilan to‘ldirishni kafolatlaydi.

O‘zbekiston–Vengriya hamkorligini rivojlantirishda suv xo‘jaligi sohasi alohida o‘ringa ega. Shuni e’tiborga olgan holda suv resurslarini boshqarish sohasida hamkorlik bo‘yicha Vengriya-O‘zbekiston qo‘shma ekspert guruhi shakllantirilgan.

Joriy yilning 18–21 aprel kunlari Vengriya Ichki ishlar vazirligining Suv resurslari departamenti direktori Piter Kovach boshchiligidagi delegatsiya mamlakatimizga tashrif buyurdi. Tashrif yakunlariga ko‘ra, O‘zbekiston–Vengriya hamkorligini rivojlantirish yuzasidan 2023–2025 yillarga mo‘ljallangan kompleks chora-tadbirlar tasdiqlandi.

Vengriyaning suv xo‘jaligi sohasidagi kadrlar tayyorlovchi ta’lim muassasalari va ilmiy tashkilotlari bilan hamkorlik yo‘lga qo‘yilgan. O‘zbekiston Respublikasi Suv xo‘jaligi vazirligining Irrigatsiya va suv muammolari ilmiy-tadqiqot instituti bilan Vengriya qishloq xo‘jaligi va tabiiy fanlar universiteti (MATE) o‘rtasida O‘zaro hamkorlik to‘g‘risida memorandum imzolangan.

Suv xo‘jaligi vaziri Sh.Xamraуev muloqot chog‘ida Yojef Roja janoblarini Vengriyaning O‘zbekistondagi Favqulodda va Muxtor elchisi lavozimiga tayinlangani bilan qutladi. Janob Elchiga mamlakatimizdagi yangi diplomatik missiyasi davomida muvaffaqiyatlar tiladi.

O‘z navbatida Yojef Roja samimiy qabul uchun minnatdorlik bildirdi. O‘zbekiston Tashqi ishlar vaziriga elchi sifatida ishonch yorlig‘ini topshirganidan so‘ng bu O‘zbekiston hukumati a’zolari bilan o‘tkazilayotgan birinchi uchrashuvi ekanligini ta’kidladi.

Muloqot chog‘ida Davlatimiz rahbari tashabbusi bilan O‘zbekiston suv xo‘jaligi sohasida olib borilayotgan islohotlar, xususan, sohani raqamlashtirish, suv tejovchi texnologiyalarni joriy etish kabi yo‘nalishlarda amalga oshirilayotgan keng ko‘lamli ishlar haqida ma’lumot berildi.

O‘zbekiston–Vengriya o‘rtasidagi o‘zaro hamkorlikni mustahkamlash, suv xo‘jaligi sohasida yaqin istiqboldagi rejalar muhokama qilindi.