Vatanparvarlik ruhini shakllantirishga yo'naltirilgan festival o‘tkazildi
2025-01-22 19:25:00 / Yangiliklar
Jajji qalblarda vatanparvarlik ruhini shakllantirish nafaqat ota-onalar, balki jamiyatning barcha qatlamlari mas’ul bo‘lgan jarayondir. Yoshlarda vatanga bo‘lgan mehr-muhabbatni shakllantirish, ularning ongu tafakkurida milliy g‘urur va vatanparvarlik tuyg‘ularini mustahkamlash maqsadida Markaziy harbiy okrug qo‘mondonligi tomonidan Samarqand viloyati Pastdarg‘om tumanidagi oilaviy nodavlat ta’lim muassasasida Vatanparvarlik festivali o‘tkazildi.
Tadbirda so‘z olganlar o‘sib kelayotgan avlodni qalbida vatanparvarlik tuyg‘usini singdirish kelajakdagi kuchli va rivojlangan jamiyat poydevorini yaratish, Vatanni himoya qiladigan va sevadigan insonlar qilib tarbiyalash – barqaror va farovon kelajak kafolati ekanligini ta’kidlashdi.
Bolajonlar uchun bayramga aylangan festivalda faxriy qorovulning saf chiqishlari, qo‘l jangi ustalarining ko‘rinishlari, harbiy orkestrning Vatanni madh etuvchi kuy-qo‘shiqlari bolalarda vatanparvarlik tuyg‘ularini mustahkamladi.
Markaziy harbiy okrug matbuot xizmati