Dastlab mehmonlarni faxriy qorovul ishtirokida rasmiy kutib olish tadbiri bo‘lib o‘tdi. Harbiy orkestr tomonidan ikki davlat madhiyasi ijro etildi.

Mudofaa vazirligi markaziy apparatida o‘tkazilgan ikki tomonlama hamkorlik uchrashuvida general-leytenant Bahodir Qurbonov delegatsiya a’zolarini O‘zbekistonga uyushtirgan tashrifi bilan qutlab, Oʻzbekiston va Slovakiya oʻrtasida ko‘plab sohalarda olib borilayotgan hamkorlik ishlari aloqalarini yanada mustahkamlashga xizmat qilayotganini taʼkidladi.

Jumladan, o‘tgan yillarda mamlakatlarimiz o‘rtasida mustahkam do‘stlik, o‘zaro hurmat va anglashuv an’analariga asoslangan yaqin va samarali hamkorlik rivojlandi. Shu yilning yanvar oyida diplomatik munosabatlar o‘rnatilganiga 
31 yil to‘ldi . Turli soha va formatlarda ochiq va konstruktiv muloqot faol qo‘llab-quvvatlanmoqda, savdo-iqtisodiy aloqalar jadal rivojlanmoqda, madaniy-ma’rifiy almashinuvlar mustahkamlanmoqda.

Ikki davlat mudofaa vazirlari harbiy sohada erishilgan yutuqlar va kelgusida amalga oshirilishi rejalashtirilayotgan hamkorlik ishlarini ko‘rib chiqishdi. Xususan, uchrashuvda harbiy, harbiy taʼlim va boshqa yoʻnalishlardagi hamkorlikni rivojlantirish istiqbollari hamda tomonlarni qiziqtirgan boshqa bir qator masalalar muhokama qilindi. 

Rasmiy qabuldan so‘ng Slovakiya Hukumati raisining o‘rinbosari va Mudofaa vaziri Robert Kalinyak boshchiligidagi delegatsiya “G‘alaba bog‘i” yodgorlik majmuasida faxriy qorovul ishtirokida “Matonat madhiyasi” monumenti poyiga gul qo‘yishdi hamda “Shon-sharaf” davlat muzeyi eksponatlari va “G‘alaba bog‘i” yodgorlik majmuasining boshqa ko‘plab monumentlari bilan tanishdi.

Slovakiya Respublikasi harbiy delegatsiyasining mamlakatimizga tashrifi davom etmoqda. Rejaga muvofiq sohaga doir bir qator obyektlarning infratuzilmasi va faoliyati bilan tanishish ko‘zda tutilgan.

Mudofaa vazirligi Axborot va ommaviy 
kommunikatsiyalar departamenti