Marosimda Markaziy harbiy okrug qoʻmondonligi, “Vatan tayanchi” bolalar va oʻsmirlar harbiy-vatanparvarlik harakati rahbari, Samarqand viloyati hokimligi, mudofaa ishlar boshqarmasi, davlat va jamoat tashkilotlari vakillari, Qurolli Kuchlar faxriylari va oʻquvchi-yoshlar ishtirok etdi.

Tadbirda dastlab, yoshlar oʻqish va sport ishlarida doimo faol boʻlishga, tengdoshlarini ergashtirish hamda buyuk ajdodlarimizga munosib izdosh boʻlishga vaʼda berishdi. Shundan soʻng, “Vatan tayanchi” otryadlarining aʼzolari boʻlgan 200 nafar yoshlarga koʻkrak nishonlari topshirildi.

Marosimda soʻz olganlar yoshlarning bergan va’dasiga sodiq qolgan holda yurtimiz ravnaqiga munosib hissa qoʻshishini tilab, “Vatan tayanchi” harakati aʼzolarining koʻrsatgan jasorati va matonatini alohida tilga olishdi va mamlakatimizda yoshlarga qaratilayotgan eʼtiborni eʼtirof etishdi.

Tadbir davomida yoshlar qalbida ona Vatanga mehr va sadoqat, adolat tuygʻusini har tomonlama kuchaytirish maqsadida namoyish etilgan buyuk ajdodlarimiz, jumladan, Amir Temur, Alisher Navoiy, Zahiriddin Muhammad Bobur, Mirzo Ulugʻbek siymosidagi sahna koʻrinishlari, harbiy orkestr jamoalarining chiqishlari hamda harbiy xizmatchilar tomonidan tayyorlangan qoʻl jangi va faxriy qorovulning chiqishlari yoshlardagi harbiylikka boʻlgan qiziqishni yanada oshirdi.

Markaziy harbiy okrug matbuot xizmati