Mudofaa vazirligi miqyosida “Toʻmaris” koʻrik-tanlovi gʻoliblari aniqlandi
2024-09-30 17:50:00 / Yangiliklar
Unda Mudofaa vazirligi tasarrufidagi harbiy okrug va qoʻmondonliklar, muassasa va birlashmalarda faoliyat olib borayotgan xotin-qizlardan iborat 8 ta jamoa bahs olib bordi.
Jamoalar bir necha kun davomida Toʻmaris siymosini gavdalantirgan holda oʻzini tanishtirish, dala sharoitida mazali taom tayyorlash, erkin uslubda 50 metr masofaga suzish, 800 x 400 x 200 x 100 metr masofalarga estafeta hamda toʻsiqli yoʻlakdan mashqlarni bajargan holda yugurish, yaradorlarni jang maydonidan olib chiqish, avtomatdan amaliy otish kabi saf, harbiy-tibbiy, jismoniy va zukkolik shartlarida bellashdi.
Musobaqa ishtirokchilarini Mudofaa vazirligi markaziy apparati masʼul ofitserlari, soha mutaxassislari va hamkor tashkilotlar vakillari shaffoflik bilan baholab bordi.
Yakuniy natijalarga koʻra, III oʻrin markazga boʻysunuvchi harbiy qism jamoasiga nasib qilgan boʻlsa, II oʻringa Toifalangan obyektlarni qoʻriqlash qoʻshinlari qoʻmondonligi jamoasi munosib koʻrildi. Toshkent harbiy okrugi jamoasi I oʻrinni qoʻlga kiritib, musobaqaning mutlaq gʻolibiga aylandi.
Sharafli kasbida soha rivojiga munosib hissa qoʻshib kelayotgan tanlov gʻoliblari diplom, kubok va esdalik sovgʻalar bilan taqdirlandi. Shuningdek, bir qator nominatsiyalar boʻyicha harbiy xizmatchilar munosib ragʻbatlantirildi.
Mudofaa vazirligi Axborot va ommaviy kommunikatsiyalar departamenti