Saudiya Arabistonining "ACWA Power" kompaniyasining Markaziy Osiyo mintaqasi bo'yicha operatsiyalar rahbari o'rinbosari Ahmad Fahad "Dunyo" AA uchun intervyusida kecha O'zbekiston Prezidenti Shavkat Mirziyoyev ishtirokida bo'lib o'tgan energetika sohasida yangi quvvatlarni ishga tushirish va navbatdagi loyihalar qurilishiga start berish marosimi haqidagi fikrlarini bildirdi:

– O'zbekiston investorlarni qo'llab-quvvatlovchi davlat ekanligiga bu yerdagi faoliyatim davomida guvoh bo'lib kelyapman. Davlatingiz rahbari boshchiligida barcha hukumat vakillari tadbirkorlar va investorlarga yaqindan ko'mak berib kelmoqda. O'zbekistonda biznes qilish uchun yetarli salohiyat bilan bir qatorda, zarur sharoit, soliq va shu kabi tashkiliy tomonlarda ham yengilliklar yaratilgan. 

Shu o'rinda, Saudiya Arabistonining O'zbekiston bilan yaqin aloqalari ham kompaniyamiz faoliyatida muhim o'rin tutmoqda. Umuman olganda, O'zbekiston nafaqat bizning mamlakatimiz investorlari uchun, balki butun dunyo sarmoyadorlari uchun katta investitsiyaviy imkoniyatlarni taqdim etishga qodir.