Assalomu alaykum. Joriy yilning o‘tgan davrida elektr energiyasi, neft va tabiiy gazdan noqonuniy foydalanish holatlari natijasida tizimga yetkazilgan zararlar haqida ma’lumot beramiz.

Energetika vazirligi huzuridagi “O‘zenergoinspeksiya” va huquqni muhofaza qiluvchi organlar bilan hamkorlikda 2024-yil 1-yanvardan 15-iyungacha o‘tkazilgan 40,8 mingta nazorat tadbirlari chog‘ida jami 38,8 mingta noqonuniy holatlar aniqlandi.

Mazkur noqonuniy holatlarning 13,5 mingtasi tabiiy gazdan, 25,3 mingtasi esa elektr energetikasidan qonunga xilof ravishda foydalanish bilan bog‘liqdir.

Energiya resurslaridan noqonuniy foydalanish holatlari Navoiy, Sirdaryo hamda Toshkent viloyatlarida boshqa hududlarga nisbatan ko‘proq aniqlangan.

Mamlakatimizda ayrim huquqbuzarlar tomonidan hisobot davrida 255 milliard 200 million so‘mlik tabiiy gaz hamda 297 milliard 300 million so‘mlik elektr energiyasidan noqonuniy foydalanilishi natijasida davlat manfaatlariga jami 552 milliard 500 million so‘mlik zarar yetkazilgan.

Ularga nisbatan 220,1 milliard so‘mlik tabiiy gazdan noqonuniy foydalanganlik holatlari bo‘yicha 236 ta va 139,5 milliard so‘mlik elektr energiyasidan noqonuniy foydalanganlik holatlari bo‘yicha 479 ta jinoyat ishlari qo‘zg‘atilgan.

Misol uchun, Farg‘ona viloyatining Rishton tumanida faoliyat yurituvchi MChJga qarashli avtomobillarga gaz to‘ldirish kompressor shoxobchasida o‘rnatilgan kompressor agregatlari tijorat maqsadida elektr tarmog‘iga o‘zboshimchalik bilan ulanib, 3 milliard 600 million so‘mlik elektr energiyasi talon-toroj qilingan.

Xorazm viloyatining Urganch tumanidagi fermer xo‘jaligi esa o‘ziga qarashli binoda yashirin yo‘llar bilan qo‘shimcha tarmoq tortib, tabiiy gazdan noqonuniy ravishda foydalanib kelgan. Uning bu jinoiy qilmishi oqibatida davlat manfaatlariga 3 milliard 374 million so‘mlik zarar yetkazilgan.

Toshkent viloyatining Toshkent tumanida istiqomat qiluvchi fuqaro o‘z xonadonining yerto‘lasida mayning qurilmalarini hisoblagichdan tashqari yashirin yo‘l bilan elektr tarmog‘iga ulab, hisobga olinmagan 3 milliard so‘mlik elektr energiyasini isrof qilgan.

Huquqni muhofaza qiluvchi organlar tomonidan energiya resurslaridan foydalanish qoidalarini buzish bilan bog‘liq huquqbuzarliklar bo‘yicha 17,2 mingta ma’muriy hamda 715 ta jinoiy ish rasmiylashtirilib, aybdorlar tegishli tartibda jazoga tortildilar.

Hurmatli yurtdoshlar!

Agar Siz energiya resurslaridan noqonuniy foydalanilishi, tabiiy gaz va elektr energiyasi tarmoqlariga ruxsatsiz ulanib olish holatlariga guvoh bo‘lsangiz, Energetika vazirligi huzuridagi “O‘zenergoinspeksiya”ning 71-200-02-86 raqamli “Ishonch telefoni”ga, shuningdek, huquqni muhofaza etish organlariga murojaat qilishingiz mumkin. Sizning shaxsingiz sir qolishi kafolatlanadi.

Eslatib o‘tamiz, energiya resurslari tarmoqlariga o‘zboshimchalik bilan ulanganlik uchun qonunchilikda belgilangan tartibda javobgarlik bor.

Masalan, o‘zboshimchalik bilan hisoblagichsiz tarmoqqa ulanish uchun amaldagi tarif bo‘yicha yetkazilgan zararning kamida 3 barobariga teng koeffitsientda jarima qo‘llaniladi.

Mayning qurilmalarini tarmoqqa noqonuniy ulaganlik uchun esa yetkazilgan zararning 5 barobari miqdorida jarima qo‘llaniladi.

Qolaversa, qonunchilikka ko‘ra, umumiy foydalanishdagi elektr, issiqlik yoki tabiiy gaz tarmoqlariga tijorat maqsadlarida o‘zboshimchalik bilan ulanish yoxud elektr energiyasini va tabiiy gazni hisobga olish asboblariga, shu jumladan ularning plombalariga qasddan shikast yetkazish yoxud hisobga olish asboblarining ko‘rsatkichlarini o‘zgartirish maqsadida ularga tashqaridan aralashish yo‘li bilan talon-toroj qilish — o‘g‘rilik hisoblanadi.

Mazkur jinoyat uchun 5 yilgacha ozodlikdan mahrum qilish jazosi qo‘llanilishi mumkin.

Qonunni bilmaslik esa javobgarlikdan ozod qilmaydi.