O‘zbekiston Respublikasi Madaniyat vazirligi

27–30-iyun kunlari Jizzax viloyatining Zomin tumanida YUNESKO va AYSESKO shafeligi ostida “II Xalqaro maqom san’ati anjumani” o‘tkaziladi.

O‘zbekistonda ikkinchi marotaba o‘tkazilayotgan anjumanda 80 ga yaqin davlatdan 400 nafardan ortiq ishtirokchilar qatnashadi.

27–iyun kuni Jizzax viloyatining Zomin tumanida “II Xalqaro maqom san’ati anjumani”ning tantanali ochilish marosimi bo‘lib o‘tadi. Unda, YUNESKO Bosh anjumani raisi M.Mikulesku, AYSESKO tashkiloti bosh kotibi o‘rinbosari A.Kerimov, Xalqaro turkiy madaniyat tashkiloti – TURKSOY Bosh kotibi S.Rayev, Turkiy madaniyat va meros fondi Prezidenti A.Raimkulova, Turkiy Parlament Assambleyasi raisi Mehmet Sureyya Er, Mustaqil Davlatlar Hamdo‘stligi Bosh kotibi o‘rinbosari N.Seytimov, Xalqaro folklor tashkilotining Osiyo mintaqasi bo‘yicha Bosh kotibi Mun Hyung Suk, Tojikiston Respublikasi madaniyat vaziri o‘rinbosari M.Sharifzoda, Ozarbayjon Respublikasi madaniyat vaziri A.Karimli, Turkiya Respublikasi madaniyat va turizm vaziri M.N.Ersoy, Turkmaniston madaniyat vaziri o‘rinbosari N.Shirimov, Qirg‘iz Respublikasi madaniyat, axborot, sport va yoshlar siyosati vazirining birinchi o‘rinbosari T.Ajimaliyev hamda O‘zbekistonda faoliyat yurituvchi diplomatik korpus vakillari – elchi, konsul, maslahatchilar ishtirok etadi.

28-29-iyun kunlari O‘zbekistonda ikkinchi marotaba o‘tkazilayotgan “II Xalqaro maqom san’ati anjumani” doirasida “Maqom san’atining nazariy va amaliy asoslari: muammo va yechimlar” mavzusidagi Xalqaro ilmiy-amaliy konferensiyasi (soat 10:00da Zomin shahri “Bog‘ishamol” majmuasida) bo‘lib o‘tadi.

28-29-iyun kunlari (soat 19:00da) “II Xalqaro maqom san’ati anjumani”ga tashrif buyurgan ishtirokchilar o‘rtasida ko‘rik-tanlov o‘tkazilib, xalqaro hay’at tomonidan ishtirokchilarning chiqishlari uchta nominatsiya: “Eng yaxshi maqom ansambli”, “Eng yaxshi yakkaxon cholg‘u ijrochisi” va “Eng yaxshi yakkaxon xonanda” bo‘yicha baholanadi. (Ma’lumot uchun, xalqaro tanlov hakamlar hay’ati a’zoligiga AQSH, Ozarbayjon, Misr, Turkiya, O‘zbekiston, Hindistondan hakamlar ro‘yxati shakllantirilgan.)

“II Xalqaro maqom san’ati anjumani” doirasida o‘tkaziladigan ko‘rik-tanlov g‘oliblari Tashkiliy qo‘mita tomonidan diplom, statuyetka va quyidagi miqdorda pul mukofotlari bilan taqdirlanadi:

“Gran-Pri”- 15 000 AQSH dollari;

1-o‘rin- quyidagi nominatsiyalar bo‘yicha:

-yakkaxon ijrochi (xonanda yoki sozanda) – 10 000 AQSH dollari,

-ansambl jamoasi uchun – 10 000 AQSH dollari

 2-o‘rin- quyidagi nominatsiyalar bo‘yicha:

-yakkaxon ijrochi (xonanda yoki sozanda) – 7 000 AQSH dollari,

-ansambl jamoasi uchun – 7 000 AQSH dollari

 3-o‘rin- quyidagi nominatsiyalar bo‘yicha:

-yakkaxon ijrochi (xonanda yoki sozanda) – 5 000 AQSH dollari,

-ansambl jamoasi uchun – 5 000 AQSH dollari

Bundan tashqari anjuman doirasida faol ijrochilarni qo‘llab–quvvatlash  va rag‘batlantirish maqsadida, “Eng yaxshi maqom xonandasi”, “Eng yaxshi maqom sozandasi”, “Eng yaxshi maqom ustozi”, “Eng yaxshi maqom targ‘ibotchisi”, “Eng yaxshi yosh maqomchi”, “Eng yaxshi maqom bastakori” kabi nominatsiyalar bo‘yicha ishtirokchilar rag‘batlantiruvchi sovg‘a va mukofotlar bilan taqdirlanadi. Anjumanning har bir ishtirokchisiga “Xalqaro maqom san’ati anjumani ishtirokchisi” sertifikati taqdim etiladi.

Shuningdek, Zominsoy majumasi hududida anjuman doirasida hududlarning o‘ziga xos madaniyati va san’atini namoyish etish uchun respublikaning 14 ta hududi o‘z povilonlarini tashkil etdi. “II Xalqaro maqom san’ati anjumani” davomida hududlarga ajratilgan pavilionlarda xalqaro musiqa yarmarkasi, maqom san’atiga oid turli ko‘rgazmalar, jumladan, milliy sozlar va liboslar, hunarmandchilik buyumlari, tasviriy va amaliy san’at asarlari, haykaltaroshlik namunalari, badiiy va hujjatli filmlar, audio va video disklar, kitoblar, fotosuratlar namoyishi ko‘zda tutilgan bo‘lib, “II Xalqaro maqom san’ati anjumani” o‘zbek milliy maqom san’atining noyob namunalarini keng targ‘ib qilish, uni asrab-avaylash va rivojlantirish, yosh avlod qalbida milliy mumtoz san’atimizga hurmat va e’tibor tuyg‘ularini kamol toptirish, turli xalqlar o‘rtasidagi do‘stlik va birodarlik rishtalarini mustahkamlash, ijodiy hamkorlik, madaniy-ma’naviy munosabatlar doirasini xalqaro miqyosda kengaytirish maqsadida tashkil etilmoqda.

30-iyun kuni Zomin tumanida “II Xalqaro maqom san’ati anjumani”ning tantanali yopilish marosimi bo‘lib o‘tadi. Unda, uchta nominatsiya: “Eng yaxshi maqom ansambli”, “Eng yaxshi yakkaxon cholg‘u ijrochisi” va “Eng yaxshi yakkaxon xonanda” bo‘yicha g‘oliblar e’lon qilinib taqdirlanadi.

Eslatib o‘tamiz, birinchi xalqaro maqom san’ati anjumani 2018-yilning 6-10 sentyabr kunlari Shahrisabz shahrining tarixiy markazida o‘tkazilgan. Unda jahonning 75 mamlakatidan yakkaxon xonandalar, folklor jamoalari, diplomatik korpus vakillari ishtirok etgandi.