Surxondaryo viloyati Jarqo'rg'on tumani hokimligi

"Kambag‘allikdan farovonlik sari" dasturi doirasida Jarqo‘rg‘on tumanida amaliy ishlar olib borilmoqda

O‘zbekiston Respublikasi Prezidentining 2024-yil 24-sentabrdagi "Kambag‘allikdan farovonlik sari" dasturini amalga oshirish bo‘yicha birinchi navbatdagi chora-tadbirlar to‘g‘risidagi PQ-330-sonli qarorini ta’minlash maqsadida mamlakatimizda keng ko‘lamli amaliy ishlar olib borilmoqda.

Shu munosabat bilan, O‘zbekiston Savdo-sanoat palatasi mas’ullari – Halimjon Safarov va Azizjon Husonov rahbarligida mahalla tashkilotlari (mahalla yettiligi) bilan hamkorlikda Jarqo‘rg‘on tumanida faoliyat yuritayotgan mahallalarda chuqur o‘rganishlar olib borilmoqda. Ushbu jarayonda ijtimoiy himoyaga muhtoj, og‘ir toifaga kiruvchi oilalar aniqlanib, ularning hayotiy sharoitlarini yaxshilash bo‘yicha zarur amaliy ishlar tashkil etilmoqda.

Dastur doirasida quyidagi asosiy yo‘nalishlar bo‘yicha ish olib borilmoqda:
✅ Ijtimoiy yordam va moddiy ko‘mak: Muhtoj oilalarni moddiy jihatdan qo‘llab-quvvatlash, davlat va xayriya tashkilotlari yordamlarini yetkazish.
✅ Bandlikni ta’minlash: Ishsiz fuqarolarni kasb-hunar va tadbirkorlik faoliyatiga jalb qilish, subsidiya va kredit ajratish orqali ularning doimiy daromad manbaiga ega bo‘lishiga ko‘maklashish.
✅ Uy-joy va infratuzilma: Muhtoj oilalarning turmush sharoitlarini yaxshilash, ta’mirtalab uylarni ta’mirlash, zarur kommunal xizmatlar bilan ta’minlash.
✅ Tadbirkorlikni qo‘llab-quvvatlash: Ishbilarmonlik muhitini rivojlantirish, mahalliy tadbirkorlarni qo‘llab-quvvatlash hamda yangi ish o‘rinlari yaratishga ko‘maklashish.

Mazkur tashabbuslar natijasida, Jarqo‘rg‘on tumanida ijtimoiy himoyaga muhtoj aholi qatlamining hayot darajasi sezilarli darajada yaxshilanishi, mahallalarda bandlikni ta’minlash va kambag‘allik darajasini pasaytirish bo‘yicha samarali ishlar amalga oshirilishi kutilmoqda.

Aholini ushbu dastur doirasida faol ishtirok etishga va o‘z atrofidagilarga ko‘mak berishga chorlaymiz. Birgalikda farovon kelajak sari intilaylik!