O‘zbеkiston Rеspublikаsi Ichki ishlаr vаzirligi

Bugun tarixiy sana — 9-fevral erta tongdan Toshkent shahridagi Adiblar xiyobonida soʻz mulkining sultoni, buyuk mutafakkir Alisher Navoiy tavalludining 583-yilligi munosabati bilan shoir haykali poyiga gul qoʻyish marosimi boʻlib oʻtdi.

Maʼnaviy-maʼrifiy tadbirda ziyolilar, ijodkorlar, tashkilotlar va keng jamoatchilik vakillari ishtirok etdilar. Barcha tashkilot va vazirliklar qatorida Oʻzbekiston Respublikasi Ichki ishlar vazirligi markaziy apparati xodimlari, IIV ixtisoslashgan maktab-internati oʻquvchilari, IIV Akademiyasi kursantlari, IIV Alohida namunali orkestri jamoasining ishtiroki tadbirga oʻzgacha shukuh bagʻishladi.

Tadbirni Oʻzbekiston Yozuvchilar uyushmasi raisi Sirojiddin Sayyid ochib, yurtimizdagi adabiy islohotlarda Alisher Navoiy asarlarini oʻrganish, keng targʻib qilish va uni xorijiy tillarga tarjima qilishga alohida eʼtibor qaratilayotganini taʼkidladi. Xususan, ozarbayjonlik navoiyshunos olimlar — Almaz Ulvining ozar tilida “Alisher Navoiyning asri va nasri”, Ramiz Asker tomonidan Alisher Navoiyning “Xamsa”, “Mahbub ul-qulub” asari ozarbayjon tiliga toʻliq tarjima qilinib, Bokuda chop etildi.

Shundan soʻng, Qozogʻiston Respublikasi elchixonasi maslahatchisi Jasulan Isakov soʻzga chiqib, Oʻzbekiston va Qozogʻiston oʻrtasida tobora rivojlanib borayotgan madaniy-gumanitar hamkorliklar hamda 2023-yilda Astana shahrida Alisher Navoiy haykali barpo etilganini taʼkidladi.

Shuningdek, tashrif buyurgan mehmonlar tomonidan Navoiy ijodi, uning qoldirgan boy maʼnaviy merosi, gʻazallari va ruboiylaridan namunalar oʻqildi, shoir asarlarining dunyo adabiyoti rivojida tutgan oʻrni, ahamiyatiga eʼtibor qaratilib, Navoiy ijodiga oid kitoblar koʻrgazmasi tashkil etildi. Mumtoz navolarning jarangi esa yigʻilganlarni ulugʻ mutafakkirni yana bir karra anglashga chorladi.

Bugungi bayram mamlakatimizda keyingi yillarda madaniyat, adabiyot va sanʼat rivojiga qaratilayotgan eʼtiborning bir namunasidir, — dedi Alisher Navoiy nomidagi Adabiyot muzeyi direktori Jabbor Eshonqulov. – Navoiy soʻzlarining sehri, kuchi, qudrati Adiblar xiyobonida ham barchamizni birlashtirib turibdi. Muzeyimizda navoiyshunoslar ishtirokida mutafakkirning “Munshaot”, “Muhokamat ul-lugʻatayn”, turkiyalik olimlar bilan Istambulda “Badoeʼ ul-bidoya” asarlarining tanqidiy matni, tabdili, faksimil nashrlari chiqdi.

Tadbir davomida filologiya fanlari nomzodi Akromjon Dehqonov, Eron Islom Respublikasi Mashhad universiteti professori Gʻulom Rizo Razmiyning nutqi tinglandi. Unda soʻz mulkining sultoni Alisher Navoiy ijodiyoti, uning gʻazallarida tinchlik va doʻstlik gʻoyalarining tarannum etishi, Navoiyning Erondagi muzey va fondlarda saqlanayotgan qoʻlyozmalari hamda ushbu mamlakat hududidagi Navoiy barpo ettirgan meʼmoriy obidalar haqida soʻz bordi.

Maʼrifiy kechada Oʻzbekiston xalq shoiri Abdulla Sherning Navoiyga bagʻishlangan sheʼrini, yosh tarjimon Madinabonu Muhammadrizayeva shoir gʻazallaridan oʻzi qilgan inglizcha tarjimasini hamda Toshkent davlat Sharqshunoslik universitetida taʼlim olayotgan xorijlik talabalar shoir gʻazallaridan chet tillarda oʻqib berdi. Oʻzbekistonda xizmat koʻrsatgan artist Gulbahor Erqulova Navoiy gʻazaliga bastalangan qoʻshiq ijro etdi.

Keng jamoatchilik ishtirokida Alisher Navoiy haykali poyiga gul qoʻyish marosimida shoir siymosiga ehtirom koʻrsatildi.

Tadbir soʻngida IIV Akademiyasi kursantlari, Adabiyotshunos professor oʻqituvchilar ishtirokida gʻazalxonlik davrasi tashkil etilib, shoirning hayoti va ijodiga oid sahna koʻrinishlari namoyish etildi.

IIV Axborot xizmati