Sirdaryo viloyati IIBda 2023-yil yakuniga bagʻishlangan sarhisob yigʻilishi boʻlib oʻtdi
2024-01-29 16:10:00 / Yangiliklar
Sirdaryo viloyati Ichki ishlar boshqarmasi boshligʻi polkovnik Sanjar Djabarov huzurida viloyat Ichki ishlar organlari xodimlari tomonidan 2023-yil davomida amalga oshirilgan ishlar, erishilgan yutuqlar va yoʻl qoʻyilgan xato-kamchiliklar muhokamasiga bagʻishlangan yigʻilish oʻtkazildi.
Yigʻilish videokonferensiya koʻrinishida oʻtkazilib, viloyat studiyasidan boshqarma boshligʻi oʻrinbosarlari, sohaviy xizmat rahbarlari, shahar-tuman IIB boshliqlari, shahar-tuman studiyalaridan esa Ichki ishlar boʻlimlarining masʼul xodimlari ishtirok etishdi.
Dastlab, boshqarma boshligʻi oʻrinbosarlari tomonidan soha xizmatlarida amalga oshirilgan ijobiy ishlar, shu bilan birga yoʻl qoʻyilgan kamchiliklar va joriy yilda amalga oshirilishi lozim boʻlgan ishlar toʻgʻrisida batafsil axborot berildi.
Boshqarma boshligʻi masʼullarning axboroti boʻyicha kamchilikka yoʻl qoʻyilgan soha xizmat yoʻnalishlarini keskin tanqid qilib, bunga sababchi boʻlgan xodimlarning oʻtgan davr mobaynidagi faoliyatlari atroflicha muhokama qilindi va tegishli intizomiy taʼsir choralari koʻrish, shuningdek, ijobiy ish koʻrsatkichlariga erishgan xodimlarni esa munosib ragʻbatlantirish haqida aniq topshiriqlar berdi.
Yigʻilish soʻnggida, viloyat hududida kriminogen vaziyatni barqarorlashtirish, jinoyatchilik va huquqbuzarliklarni barvaqt oldini olish, jamoat hamda yoʻl harakati xavfsizligini taʼminlash maqsadida aniq belgilangan yoʻl xaritasi boʻyicha ish tashkil etish, ayniqsa jinoyatlarning salmogʻi oshib ketgan turlari yuzasidan aholi oʻrtasida tezkor profilaktik targʻibot tadbirlarini kuchaytirish, jinoyatchilikka qarshi kurashishda zamonaviy ilgʻor texnologiyalar imkoniyatlaridan keng foydalanish, kameralashtirish orqali hududlarni toʻliq qamrovga olish va boshqa masalalar yuzasidan masʼullarga tegishli vazifalar yuklatildi.
Sirdaryo viloyati IIB Axborot xizmati