Ichki ishlar vazirligi huzuridagi Jamoatchilik kengashining 2023-yil yakunlariga bagʻishlangan hisobot yigʻilishi tashkil etildi
2024-01-26 17:00:00 / Majlislar
Joriy yilning 26-yanvar kuni Ichki ishlar vazirligi huzuridagi Jamoatchilik kengashi aʼzolarining yillik hisobot uchrashuvi tashkil etildi.
Tadbir oldidan, ishtirokchilar Jazoni ijro etish departamenti faoliyati, yaratilgan sharoitlar va imkoniyatlar bilan yaqindan tanishdilar, shuningdek, tizimda amalga oshirilgan ishlar, ishlab chiqarish salohiyatlari, mahkumlarning sharoitlari va soha islohotlari haqida tayyorlangan videorolik namoyish etildi.
Kengash yigʻilishida Jamoatchilik kengashi raisi, Oʻzbekiston va Qoraqalpogʻiston xalq artisti Yodgor Saʼdiyev 2023-yil davomida Ichki ishlar vazirligi tizimida amalga oshirilgan ishlar, oʻtkazilgan tadbirlar natijadorligi, shuningdek Kengash faoliyatini yanada rivojlantirish haqida fikr yuritib, Jamoatchilik kengashi tomonidan bildirilgan takliflar muhokama etildi.
Kun tartibiga binoan Ichki ishlar vazirligi axborot xizmatining faoliyati haqida hisobot tinglandi.
Maʼlum qilinishicha, oʻtgan davrda IIV Axborot xizmati va uning quyi xizmatlari tomonidan mamlakatimiz OAV va internet tarmoqlarda ichki ishlar organlari faoliyatiga oid jami 161 690 ta axborot tarqatilgan boʻlib, oʻtgan yilning shu davriga nisbatan 4,9 foizga oshgan (Ulardan, televideniyeda – 13265, radioda – 7898 ta, bosma nashrlarda – 5186 ta hamda internet tarmoqlarida – 135341 ta). Xorijiy OAVda Oʻzbekiston ichki ishlar organlari faoliyati bilan bogʻliq 94 ta axborot eʼlon qilingan.
Tegishli media-rejalar asosida 345 ta press-tadbirlar (brifing, matbuot anjuman, press-tur va boshqalar) oʻtkazilib, shundan, 14 tasi Vazirlik sohaviy xizmatlari, 331 tasi hududiy IIO rahbarlari ishtirokida tashkil etilgan.
Shu bilan birga, alohida vaziyatlar yoki shov-shuvli holatlar yuzasidan Ichki ishlar organlarining sohaviy rahbarlari tomonidan OAV da jami 1 827 marotaba chiqishlari tashkil etilgan.
Hozirda, IIV Axborot xizmati hamda Oʻzbekiston MTRK va Milliy media assotsiatsiyasi bilan kelishuvlar asosida, tizim faoliyatiga oid 16 ta kunlik va haftalik maxsus koʻrsatuv hamda dasturlar namoyish etilmoqda.
Ijtimoiy tarmoqlar orqali aholini turli qatlamini qamrab olish maqsadida IIV Axborot xizmati tomonidan 11 ta avtorlik koʻrsatuv tayyorlanadi. Bir nechta davlat va xususiy kinostudiyalar bilan hamkorlikda tizim imijini oshirish borasida amaliy hamkorlik yoʻlga qoʻyilgan.
Albatta taʼkidlash oʻrinli, tizim imijini shakllantirish, xodimlarning xizmat intizomiga rioya etishlarini nazorat qilish, shuningdek ularning maʼnaviy dunyoqarashini boyitishda Vazirlik tomonidan oʻtkaziladigan maʼnaviy–maʼrifiy tadbirlarning alohida oʻrni bor.
Yigʻilish davomida vazirlik Maʼnaviy-maʼrifiy ishlar va kadrlar bilan taʼminlash departamenti masʼullari tomonidan mazkur yoʻnalishdagi ishlar, kadrlarni ishga qabul qilish, nomzodlar bilan oʻtkaziladigan sinovlar haqida maʼlumotlar berildi.
Shuningdek, fuqarolar murojaatlari bilan ishlash boshqarmasi masʼullari ham ayni paytda kelib tushgan murojaatlarning yechimi, ariza va shikoyatlarni koʻrib chiqish tartibi haqida aniq maʼlumotlar keltirib, bunda kengash faoliyatining samaradorligi haqida fikr bildirishdi.
Ochiq va samimiy ruhda oʻtgan hisobot uchrashuvi davomida kengash aʼzolari oʻzlarini qiziqtirgan savollariga atroflicha javob olishdi.
Yigʻilish soʻngida Ichki ishlar vazirining maslahatchisi, kengash raisining oʻrinbosari general-polkovnik Zokirjon Almatov soʻzga chiqib, avvalo Ichki ishlar organlarining yanada xalqchil tuzilmaga aylanishida kengash aʼzolarining mehnati katta ekanligini, jinoyatchilikni barvaqt oldini olish hamda yoshlar tomonidan sodir etilayotgan huquqbuzarliklarning profilaktikasiga qaratilgan ishlarni olib borishda jamoatchilik aʼzolarining salohiyati katta ekanligini eʼtirof etib, kelgusida rejalashtirilgan ishlar va tadbirlar haqida toʻxtalib oʻtdilar.
Kengash aʼzolari shu kuni yangidan bunyod etilgan “Ichki ishlar organlari tarixi muzeyi”da boʻlishdi.
Uzoq tarixni oʻzida mujassam etgan majmuada ayni paytda 4 mingdan ortiq eksponatlar joy olgan. Muzeyda tashkil etilgan mard oʻgʻlonlar xotirasi mangu barhayot, tarix va bugun kabi burchaklar mehmonlarda ayniqsa, chuqur taassurot qoldirdi.
Tizim tarixini oʻrganish va saboq chiqarish oʻsib kelayotgan yoshlar uchun chinakam hayot maktabi boʻlishi, yurtga sadoqat va mardlik gʻoyalarini shakllantirishda muhim vosita ekanligi taʼkidlab oʻtildi.
“Ichki ishlar organlari oʻzida juda katta tarixni jamlaganini xalqimiz yaxshi biladi. Ochigʻi yangi muzeyga birinchi bor tashrif buyuryapmiz, turli davrlarda xizmat qilgan xodimlarning mashaqqatli mehnati, ular bosib oʻtgan shonli yoʻl kelajak avlod uchun chinakam hayot maktabi ekanini alohida taʼkidlamoqchiman. Bugun Ichki ishlar organlarida yangilanish va islohotlar davri boshlangan, buni hamma sohada koʻrishimiz mumkin. Muzeyning yana bir ahamiyatli tomoni barcha fuqarolarimiz uchun ochiqligi, xalqimiz fidoiy va zahmatkash xodimlarning kecha va buguni haqida barcha qiziqarli maʼlumotga ega boʻlishlari mumkin” – deydi IIV huzuridagi Jamoatchilik kengashi aʼzosi Oʻzbekiston xalq shoiri Usmon Azim.
Muxtasar aytganda, oʻtkazilgan hisobot yigʻilishi vazirlik huzuridagi Jamoatchilik kengashi faoliyatini yanada yaxshilash va bu borada aniq taklif hamda tadbirlarni amalga oshirishda muhim vosita boʻlib xizmat qiladi.
IIV Axborot xizmati