Yangi yil bayramiga tayyorgarlik koʻrish va uni oʻtkazish davrida jamoat tartibini saqlash, fuqarolar xavfsizligini taʼminlash, jinoyatchilik va huquqbuzarliklarning oldini olish boʻyicha ishlarni samarali tashkil etish maqsadida Fargʻona viloyati IIB boshligʻi oʻrinbosari, Jamoat xavfsizligi xizmati rahbari, podpolkovnik Farruh Usarov Soʻx tumanida boʻldi.

Dastlab tuman markazida joylashgan bozorlar va aholiga xizmat koʻrsatuvchi obyektlar oʻrganilib, fuqarolar bilan suhbat oʻtkazildi.

Oʻrganish davomida huquqni muhofaza qiluvchi organlar va boshqa tashkilotlar vakillari bilan bayram tadbirlarini tinch va osoyishta oʻtkazilishini taʼminlash maqsadida kuch vositalarni toʻgʻri taqsimlash hamda hamkorlikda ishlarni amalga oshirish borasida zarur topshiriqlar berildi.

Shuningdek, boshqarma boshligʻi oʻrinbosari “Hushyor” mahalla fuqarolari yigʻiniga tashrif buyurib, profilaktika inspektori va mahalla faollari bilan yaqindan tanishdi, “xonadonbay” usulida oʻrganishlar olib bordi.

Soʻx tumani ichki ishlar boʻlimi, PPX va JTSB vaqtincha saqlash hibsxonasi hamda Tezkor vazifalarni bajaruvchi safarbarlik otryadi binolari, ushbu maskanlarda xodimlarga yaratilgan sharoitlar, moddiy-texnik taʼminot, xavfsizlik choralari taʼminlanganligi va xizmat jarayonlari koʻzdan kechirildi.

“Xavfsiz hudud – dolzarb 40 kunligi” maxsus profilaktik tadbirlari yuzasidan Soʻx tumani markazida tungi yoʻriqnoma ham oʻtkazildi.

Fargʻona viloyati IIB Axborot xizmati