Oʻzbekiston Respublikasi ichki ishlar vaziri, general-mayor Aziz Anvarovich Tashpulatovning 8-mart – Xalqaro xotin-qizlar kuni munosabati bilan bayram tabrigi
2025-03-07 13:20:00 / Yangiliklar
Ichki ishlar organlari, harbiy tuzilmalar va taʼlim muassasalarida xizmat qilayotgan aziz opa-singillarimizni, faxriy ayollarimizni bahor faslining nafis ayyomi 8-mart – Xalqaro xotin-qizlar kuni bilan samimiy muborakbod etaman.
Ayolni eʼzozlash millatimiz, xalqimiz uchun oliy qadriyat darajasiga koʻtarilgan fazilatdir. Shu bois, Sizdek shijoatli xotin-qizlarimizning ham oilasiga, ham jamiyatga foydasi tegayotgan jasorati, matonati va irodasini har qancha taʼriflasak ozlik qiladi.
Yurtimizda olijanob xalqimiz, birinchi navbatda, xotin-qizlarimiz uchun erkin, obod va farovon hayot barpo etish – davlatimiz va jamiyatimizning eng ustuvor vazifasi etib belgilangan. Jumladan, “Oʻzbekiston – 2030” strategiyasi doirasida xotin-qizlarning faolligini oshirish, onalik va bolalikni himoya qilish, gender tenglikni qaror toptirish, ayollarning huquq va manfaatlarini taʼminlash boʻyicha keng koʻlamli chora-tadbirlar amalga oshirilmoqda.
Bu borada Gender tenglik va oila masalalari boʻyicha respublika komissiyasi samarali ish olib borayotganini taʼkidlash lozim.
Muhtaram Prezidentimiz Shavkat Miromonovich Mirziyoyev «Biz Oʻzbekistonda qanday qonun va qarorlarni qabul qilmaylik, qanday islohotlarni hayotga joriy etmaylik, davlat rahbari sifatida mening koʻz oʻngimda avvalo munis onalarimiz, mehribon opa-singillarimiz siymosi, ularning dardu tashvishlari turadi», deya alohida taʼkidlaganlar.
Mamlakatimiz ijtimoiy-siyosiy hayotining barcha sohalarida boʻlgani kabi ichki ishlar organlari tizimida ham koʻplab xotin-qizlarimiz xalq manfaatlari yoʻlida fidoyilik va sadoqat bilan xizmat qilib kelmoqdalar.
Shuni faxr bilan taʼkidlash joizki, ichki ishlar organlaridagi faol ayollarning xizmatlari davlatimiz tomonidan doimo munosib qadrlanib, har yili ular yuksak unvon hamda davlat mukofotlari bilan taqdirlab kelinmoqda. Bu barchamiz uchun quvonarli bir hol boʻlib, bunday muvaffaqiyatlaringiz bardavom boʻlishini tilaymiz.
Muhtarama ayollar, aziz opa-singillar fursatdan foydalanib, barchangizni ushbu ayyom bilan yana bir bor tabriklab, sizlarga uzoq umr, sihat-salomatlik, baxt-saodat, xonadonlaringizga fayzu baraka tilayman.
Vazir
general-mayor A.A. Tashpulatov