Tuman-shahar ichki ishlar organlari Jamoat xavfsizligi xizmati boshliqlari oʻquv yigʻin mashgʻulotlari muvaffaqiyatli yakunlandi
2025-02-23 12:10:00 / Yangiliklar
Oʻzbekiston Respublikasi Ichki ishlar vazirining tegishli farmoyishiga asosan tumani-shahar ichki ishlar organlari jamoat xavfsizligi xizmati boshliqlarining amaliy bilim va kasbiy jangovar koʻnikmalarini oshirish maqsadida, Ichki ishlar vazirligining Malaka oshirish institutida oʻquv yigʻin mashgʻulotlari oʻtkazildi.
Unda Oʻzbekiston Respublikasi Prezidenti, Hukumati va Ichki ishlar vazirligi tomonidan rahbarlarga qoʻyilayotgan bugungi kun talablariga javob beradigan yuksak kasbiy mahoratini rivojlantirish, tuman (shahar) ichki ishlar organlarida xizmat olib borayotgan jamoat xavfsizligi xizmati boshliqlarining kasbiy bilim, koʻnikma, malakalarini uzluksiz yangilash va rivojlantirish hamda jismoniy va yuridik shaxslarning murojaatlari boʻyicha ishlashda qonuniylik prinsiplariga amal qilish faoliyatini yuksaltirish yuzasidan bilim va koʻnikmalari oshirildi.
Oʻquv yigʻini yakunida rahbar xodimlarning kasbiy bilimlari bilan bir qatorda jangovar va jismoniy tayyorgarligi ham sinovdan oʻtkazilib, yakunda imtihonlardan muvaffaqiyatli oʻtgan xodimlarga Ichki ishlar vaziri oʻrinbosari general-mayor Bekmurod Abdullayev tomonidan sertifikatlar topshirildi.
Shuningdek, ichki ishlar vaziri oʻrinbosari profilaktika kichik inspektorlari bilan uchrashib yurtimizda olib borilayotgan islohotlar, tizim samaradorligi va jinoyatchilikka qarshi kurashish yoʻlida amalga oshirilayotgan keng koʻlamli ishlar haqida taʼkidlandi. Ularga egallayotgan bilim va koʻnikmalarini amaliyotda qoʻllashda oʻz kasbiga sadoqatli boʻlish, xalq manfaatlariga xizmat qilish, fuqarolarning qonuniy huquqlarini taʼminlash, jinoyatchilikka qarshi murosasiz kurashish lozimligi taʼkidlandi.
IIV Jamoat xavfsizligi departamenti Axborot xizmati