Namangan viloyatida “Yangi yil” bayramida xavfsizlikni taʼminlash boʻyicha tadbirlar muhokama qilinib, hududiy nazorat ishlari olib borildi
2024-12-25 11:05:00 / Yangiliklar
Yigʻilish viloyat IIB boshligʻi polkovnik Shuxrat Aliyev, DXX, Milliy Gvardiya, Favqulodda vaziyatlar va Davlat soliq boshqarmalari boshliqlari rahbarligida oʻtkazilib, unda IIVdan biriktirilgan masʼul xodim, boshqarma boshligʻi oʻrinbosarlari, sohaviy xizmat rahbarlari, hamkor tashkilot va idoralar vakillari ishtirok etishdi hamda Yangi yil bayramiga tayyorgarlik koʻrish va tadbirlarni oʻtkazishda fuqarolar hamda jamoat xavfsizligini taʼminlash masalalari atroflicha muhokama qilindi.
Yigʻilish davomida bayram tadbirlarini oʻtkazishda viloyat huquqni muhofaza qiluvchi organlar va boshqa mutasaddi tashkilotlar xodimlarining oʻzaro hamkorlikda xizmat tashkil etishi, “Yangi yil” archasi va boshqa ommaviy tadbirlar oʻtkaziladigan joylarda xavfsizlik choralarini kuchaytirish hamda boshqa masalalar yuzasidan masʼul rahbarlarga aniq topshiriqlar berildi.
Shundan soʻng Namangan viloyati IIB boshligʻi polkovnik Shuxrat Aliyev, Milliy gvardiya boshqarmasi boshligʻi polkovnik Xamidulla Mamatov va Favqulodda vaziyatlar boshqarmasi boshligʻi polkovnik Bunyod Egamnazarovlar tomonidan Namangan shahridagi “Bobur” bogʻi, Namangan va Toʻraqoʻrgʻon tumanlaridagi ommaviy tadbirlar oʻtkaziladigan joylar hamda Yangi yil archasi atrofida koʻrilgan xavfsizlik chora-tadbirlari, xizmatga jalb etilgan xodimlarning faoliyati hamda fuqarolarga yaratilgan shart-sharoitlar oʻrganildi.
Oʻrganishlar yakunida “Yangi yil” bayrami munosabati bilan oʻtkaziladigan tadbirlarda shaxsiy xavfsizlikni taʼminlagan holda bayramni tinch va osoyishta oʻtkazilishini taʼminlash hamda turli koʻngilsiz hodisalarga yoʻl qoʻymaslik boʻyicha masʼullarga aniq topshiriqlar berildi.
Namangan viloyati IIB Axborot xizmati