IIV Akademiyasida “Qiynoqqa solishga qarshi kurashish: xalqaro amaliyot va milliy tajriba” mavzusiga bagʻishlangan xalqaro konferensiya boʻlib oʻtdi
2024-12-21 11:25:00 / Yangiliklar
Tadbir manfaatdor vazirlik va idoralar, inson huquqlari boʻyicha milliy institutlar, qator xalqaro tashkilotlarning mintaqaviy vakolatxonalari, shuningdek, mamlakatimiz hamda xorijning yetakchi oliy taʼlim va ilmiy tadqiqot muassasalari bilan hamkorlikda tashkil qilindi.
Anjuman avvalida IIV Akademiyasi rahbari Rustam Xatamov va Inson huquqlari boʻyicha Oʻzbekiston Respublikasi Milliy markazi direktori Akmal Saidov soʻz olib, konferensiyaning dolzarb ahamiyatiga toʻxtalib oʻtdilar.
Taʼkidlanganidek, qiynoqlar insoniyatga qarshi jinoyat sifatida butun dunyoda qoralanadi. Qiynoqlarga chek qoʻyishga qaratilgan amaliy harakatlarga qaramay, ushbu muammo butunlay barham topgani yoʻq. Bugungi kunda jahonning turli nuqtalari, hatto, eng demokratik davlatlarda ham gʻayriinsoniy yoki qadr-qimmatni kamsituvchi holatlar uchrab turadi.
Xalqaro konferensiyada Oliy Majlisning Inson huquqlari boʻyicha vakili (Ombudsman) F. Eshmatova, Oʻzbekiston Respublikasi bosh prokurori oʻrinbosari S. Ortiqova, BMTning Giyohvand moddalar va jinoyatchilik boʻyicha boshqarmasi mintaqaviy vakili O. Stolp, Oliy Majlisning Bola huquqlari boʻyicha vakili (Bolalar ombudsmani) S. Rahmonova, YeXHTning Oʻzbekistondagi vakolatxonasi vakili E. Yurkovskiy, Oʻzbekiston Respublikasi Prezidenti huzuridagi Qonunchilik va huquqiy siyosat instituti direktori oʻrinbosari V. Ergashev, Huquqni muhofaza qilish akademiyasi boshligʻining birinchi oʻrinbosari Ye. Kolenko va boshqalar nutq soʻzladi. Qiynoqlarga qarshi kurashish borasida amalga oshirilayotgan ishlar, erishilgan ijobiy natijalar bilan birga, yechimini kutayotgan masalalar yuzasidan fikr-mulohazalar bildirildi.
Keyingi yillarda inson qadr-qimmati Oʻzbekistonda eng oliy qadriyatga aylangani, shaxs huquq va erkinliklarini himoya qilish, qiynoqlarga qarshi kurashish maqsadida davlatimiz rahbarining muhim farmon va qarorlari qabul qilingani, mazkur yoʻnalishdagi islohotlar samarasi yangi tahrirdagi Konstitutsiyamizda aks etgani eʼtirof etildi.
Kunning ikkinchi yarmida konferensiya ishi “Qiynoqqa solishga qarshi kurashishning xalqaro huquqiy asoslari va Oʻzbekiston Respublikasining konstitutsiyaviy tuzumi”, “Qiynoqqa solish va boshqa shafqatsiz, gʻayriinsoniy yoki qadr-qimmatni kamsituvchi muomala hamda jazo turlarini qoʻllash jinoyatiga qarshi kurashishning oʻziga xos xususiyatlari”, “Oʻzbekiston Respublikasining jazoni ijro etish siyosatida mahkum bilan muomala boʻyicha xalqaro standartlarni joriy etish” mavzusidagi sessiyalarda davom ettirildi.
Soha mutaxassislari, olimlar, xorijiy va mahalliy ekspertlarning maʼruzalari tinglandi. Qiynoqlarga qarshi kurashish mexanizmlarini takomillashtirish, xalqaro va milliy tajribaning ilgʻor jihatlari asosida huquqni qoʻllash amaliyoti uchun samarali yondashuvlar ishlab chiqish boʻyicha taklif hamda tavsiyalar bildirildi. Hamkorlikda amalga oshiriladigan chora-tadbirlar yuzasidan konferensiya rezolyutsiyasi qabul qilindi.
Shu kuni anjuman doirasida Ichki ishlar vazirligi akademiyasi Oʻzbekiston Respublikasi Prezidenti huzuridagi Qonunchilik va huquqiy siyosat instituti, Huquqni muhofaza qilish akademiyasi hamda Fanlar akademiyasi Davlat va huquq instituti bilan hamkorlik memorandumlarini imzoladi.
IIV Akademiyasi Axborot xizmati