“Oʻzbekistonda yangi uygʻonish — Uchinchi Renessans” davrida Yangi Oʻzbekistonni barpo etishning ilk kunlaridanoq Muhtaram Prezidentimiz tomonidan ikkita masala, yaʼni aholi salomatligi va xavfsizligini taʼminlash davlat siyosati darajasiga koʻtarildi.

Quvonarli tomoni shunda-ki, har bir xodim uchun sport bilan shugʻullanish – kunlik hayot tarziga aylanmoqda.

Sohada, ayniqsa, kurash, sambo, dzyudo, boks, futbol, qoʻl jangi kabi sport turlari bilan professional darajada shugʻullanayotgan xodimlarimiz soni koʻpaymoqda.

Oʻzbekiston Respublikasi IIVning 2024-yilning 30-noyabr kunidagi “Oʻzbekiston Respublikasi Qurolli Kuchlari va huquqni muhofaza qiluvchi organlar harbiy xizmatchi va xodimlari oʻrtasida sportning kurash turi boʻyicha “Ichki ishlar vaziri kubogi” musobaqasini oʻtkazish toʻgʻrisida”gi tegishli buyrugʻiga asosan joriy yilning 10-11-dekabr kunlari Surxondaryo viloyatining Termiz shahridagi “Alpomish kurash sport majmuasi”da “Oʻzbekiston Respublikasi Qurolli Kuchlari va huquqni muhofaza qiluvchi organlari harbiy xizmatchilari hamda xodimlari oʻrtasida sportning kurash turi boʻyicha “Ichki ishlar vaziri kubogi” musobaqasi boʻlib oʻtdi.

Musobaqaning taqdirlash marosimida viloyat huquq-tartibot idoralari rahbarlari ham ishtirok etishdi.

Tadbirda viloyat IIB boshligʻi polkovnik Timur Ismailov soʻzga chiqib, soʻnggi yillarda yurtimizda olib borilayotgan islohotlar, sportga boʻlgan eʼtibor haqida soʻz yuritib musobaqa ishtirokchilariga omadlar tiladi.

Sportning kurash turi boʻyicha “Ichki ishlar vaziri kubogi” musobaqasida ishtirok etgan sportchilar oʻzlarining kuchlari, chaqqonligi hamda kurash usullaridan foydalangan holda qizgʻin kurashlar olib borishdi.

Unga koʻra umum-jamoa hisobida 1-oʻrin Davlat xavfsizligi xizmati terma-jamoasi, 2-oʻrin Ichki ishlar vazirligi terma-jamoasi hamda 3-oʻrin Mudofaa vazirligi terma-jamoasiga nasib etdi.

Musobaqada ishtirok etgan xodimlar va sovrindorlar qimmatbaho hamda esdalik sovgʻalari bilan taqdirlanishdi.

Surxondaryo viloyati IIB Axborot xizmati