“Xavfsiz harakat“ loyihasi Jolbors festivalida toʻrtta mukofotga sazovor boʻldi
2024-09-30 09:00:00 / Yangiliklar
Oʻtgan yilning oktyabr oyi oxirida Toshkent shahar IIBB GROSS sugʻurta kompaniyasi bilan hamkorlikda haydovchilarning xabardorligini oshirish, svetofor va tezlik meʼyorlariga rioya qilishni targʻib qilish hamda poytaxtda yoʻl-transport hodisalari sonini kamaytirishga qaratilgan “Xavfsiz harakat“ ijtimoiy loyihasini ishga tushirgan edi.
Ushbu loyiha 22-sentyabr kuni Olma-ota shahrida boʻlib oʻtgan Jolbors Markaziy Osiyo kommunikatsiyalar festivalida toʻrtta mukofotga sazovor boʻlgani quvonarlidir.
Jolbors Festival Markaziy Osiyodagi yetakchi reklama festivallaridan biri boʻlib, har yili MDH davlatlaridan ijodiy soha vakillarini birlashtiradi.
Loyiha “Marketing” yoʻnalishida “Tajriba va brendni faollashtirish“ nominatsiyasida oltin, “Matbuot va tashqi reklama“ hamda “Media” yoʻnalishlarida “Gʻoyalar” va “Bosma materiallardan ijodiy foydalanish“ nominatsiyalarida kumush, “Strategiya” yoʻnalishida bronza medallariga sazovor boʻldi.
Xavfsiz Harakat loyihasi doirasida kattalar va bolalarni piyoda yoʻllarda yanada koʻzga tashlanadigan qiluvchi nur qaytaruvchi elementli shopper sumkalar ishlab chiqildi.
Toshkent shahar IIBB GROSS sugʻurta kompaniyasi, Uzum jamoasi, va Vazari marketing agentligi maktab oʻquvchilari uchun bir qator tadbirlar oʻtkazib, ularga yoʻllarda yurish qoidalarini tushuntirdi hamda piyodalar oʻtish joyi belgisi tushirilgan sumkalarni sovgʻa qildi.
Toshkent shahar IIBB “Xavfsiz harakat“ ijtimoiy loyihasining tashkilotchisi boʻlib, tashabbusni qizgʻin qoʻllab-quvvatladi.
Ushbu hamkorlik Toshkent shahrida yoʻl-transport hodisalarining oldini olish tadbirlarida oʻzaro yordam koʻrsatishga qaratilgan.
Toshkent shahar IIBB Axborot xizmati