Yuksak mukofot sohiblari. Mard, fidoyi xodim edi
2024-09-28 11:00:00 / Yangiliklar
Tinchlik va barqarorlikni taʼminlash, huquqbuzarliklarning oldini olish, jinoyatchilikka qarshi kurashish yoʻlida fidokorona xizmat qilayotgan ichki ishlar organlari xodimlari har qanday vaziyatda qasamyodiga sodiq qoladilar, jonni fido qilib boʻlsa-da, yurt osoyishtaligini saqlashni oʻz burchi deb biladilar. Koʻkdala tumani IIB JXX YHXB katta inspektori, katta serjant Elbek Primov ana shunday fidoyi xodimlardan biri edi.
1984-yilda Qarshi tumanida tugʻilgan lavhamiz qahramoni xizmat faoliyatini 2006-yili Qashqadaryo viloyati IIB huzuridagi Qoʻriqlash boshqarmasida militsioner lavozimida boshlagan. Oʻtgan yillar davomida u kasbiy, jangovar va jismoniy mashgʻulotlardagi faolligi, berilgan topshiriqlarni bekam-koʻst bajarishi bilan hamkasblari hurmatiga sazovor boʻldi. Soʻngra Qarshi shahar va Qarshi tumani IIB lari qoʻriqlash boʻlinmalarida xizmat qilib, halolligi, kasbga sodiqligi bilan rahbariyat eʼtiboriga tushdi.
Xizmatni 2018-yildan viloyat IIB TVBSOda davom ettirgan qahramonimiz koʻplab yosh xodimlarga murabbiylik qilib, ularga xizmat sirlarini oʻrgatdi. 2022-2023-yillarda Qoraqalpogʻiston Respublikasi IIV TVBSOda katta mutaxassis lavozimida xizmatni davom ettirdi.
Yoʻl harakati xavfsizligi boʻlinmasi katta inspektori sifatida 2023-yildan boshlab xizmat qilgan katta serjant Elbek Primov oʻz ishini puxta bilishi bilan alohida ajralib turardi, deydi tuman IIB JXX YHXB boshligʻi, kapitan Kamoliddin Normoʻminov. Joylarda targʻibot-tashviqot ishlarini olib borishda ham faol edi. Halol yigit edi. Huquqbuzarlarga nisbatan murosasiz edi.
Joriy yil 8-iyul kuni Koʻkdala tumani hududida xizmat olib borayotgan katta serjant Elbek Primov jinoyatchi to monidan yetkazilgan ogʻir tan jarohati tufayli shifoxonada vafot etdi.
Davlatimiz rahbarining farmoniga muvofiq, sharafli burchini bajarish chogʻida mardlik va fidoyilik koʻrsat gan qahramonimiz vafotidan soʻng “Jasorat” medali bilan taqdirlandi.
2008-yildan beri shirin turmush kechirib, 3 oʻgʻil farzandli boʻldik. Dadasini ishdan kelishini bolalarim doim shod-u xurramlik bilan kutib olardi, deydi turmush oʻrtogʻi Lobar Xolmurodova. U kishining xizmati, fidoyiligi eʼtibordan chetda qolmagani meni quvontirdi. Ichki ishlar vaziri, general-leytenant Poʻlat Bobojonov davlatimizning yuk sak mukofotini topshirganda, butun hayotim koʻz oʻngimda mujassam boʻldi. Turmush oʻr togʻimning yurt tinchligi yoʻlida jon fido qilgani, bolalarim bilan viloyat IIB va vazirlik rahbariyati nazaridan, eʼtiboridan chetda qolmaganimiz uchun, uning xizmati shu darajada qadrlan gani uchun Prezidentimizdan minnatdorman.
Bugungi kunda marhum Elbek Primovning barcha farzandlari maktabda tahsil olishmoqda. Viloyat va tuman IIB xodimlari uning oilasiga moddiy va maʼnaviy yordam koʻrsatishmoqda. Toʻngʻich farzandi Asadbek ota kasbi ga havasmand ulgʻaymoqda. “Dadamning kasbini albatta davom ettiraman va ulardek mard, jasoratli inson boʻla man”, deydi Asadbek. Demak, Elbek Primovning jasorati yosh avlod uchun matonat va ibrat maktabi boʻlib qoladi.
Sodiq Rahimov, oʻz muxbirimiz. “Postda”
Qashqadaryo viloyati