Qarshi shahrida Ichki ishlar organlari xodimlari oʻrtasida qoʻl jangi sport turi boʻyicha “IIV kubogi“ musobaqasi oʻtkazildi
2024-09-24 07:40:00 / Yangiliklar
Ichki ishlar organlari xodimlarining jismoniy va jangovar tayyorgarligini oshirishda sportning ahamiyati katta. Shu maqsadda Ichki ishlar vazirining 2024-yil 05-sentyabr kunidagi “Ichki ishlar organlarining tarkibiy tuzilmalari va hududiy boʻlinmalari terma jamoalari oʻrtasida sportning qoʻl jangi turi boʻyicha “Ichki ishlar vaziri kubogi” musobaqasini oʻtkazish toʻgʻrisida”gi farmoyishiga asosan, uch kun davom etgan musobaqalarda mamlakatimizning barcha viloyatlaridan tashrif buyurgan ichki ishlar organlarining sportchilari sakkiz vazn toifasida oʻzaro bellashdilar.
Qarshi shahridagi huquqni muhofaza qilish organlari qoʻl jangi federatsiyasi sport saroyida boʻlib oʻtgan musobaqalar qizgʻin va murosasiz bahslarga boy kechdi.
Adolatli hakamlar hayʼati, yaratilgan qulay shart-sharoitlar musobaqaning yanada qiziqarli va shiddat bilan oʻtishiga zamin hozirladi.
Murosasiz oʻtgan bahslarning final bosqichlarini muxlislar katta qiziqish bilan tomosha qilishdi.
Kuchlilar va tajribalilarga gʻalaba nasib etgan sport musobaqasining shaxsiy birinchilik bahslarida Fargʻona viloyat ichki ishlar boshqarmasi xodimi 57 kilogramm vazn toifasida Jurabayev Xudoyberdi, Navoiy viloyat ichki ishlar boshqarmasi xodimi 62 kilogramm vazn toifasida Mardonov Islombek, Samarqand viloyat ichki ishlar boshqarmasi xodimi 67 kilogramm vazn toifasida Normurododov Orif, Toshkent shahar ichki ishlar boshqarmasi xodimi 80 kilogramm vazn toifasida Xujamberdiyev Dilmurod, Buxoro viloyat ichki ishlar boshqarmasi xodimi 88 kilogramm vazn toifasida Turayev Xasan, va Qoraqalpogʻiston Respublikasi ichki ishlar boshqarmasi xodimi 97 kilogramm vazn toifasida Ochilov Bexruz va Jizzax viloyat ichki ishlar boshqarmasi xodimi +97 kilogramm vazn toifasida Moʻminov Shahboz gʻoliblikni qoʻlga kiritdi.
Umumjamoa hisobida esa faxrli 1-oʻrinni Fargʻona viloyat ichki ishlar boshqarmasi jamoasi band etdi. Navbatdagi sovrinli oʻrinlar Jizzax viloyat boshqarmasi va Qashqadaryo va Navoiy jamoalariga nasib etdi.
Gʻolib polvonlar va jamoalar Ichki ishlar vazirligining kubogi, diplomlari va qimmatbaho sovgʻalari bilan taqdirlandi.
Qashqadaryo viloyati IIB Axborot xizmati