Reportaj. Burchga sadoqat beiz ketmas
2024-09-12 20:00:00 / Yangiliklar
Oʻzbekiston Respublikasi Ichki ishlar vazirligi Madaniyat saroyida mustaqilligimizning 33-yilligi munosabati bilan tizimda fidokorona xizmat qilayotgan bir guruh xodimlarga davlatimizning yuksak mukofotlarini tantanali ravishda topshirish marosimi boʻlib oʻtdi.
Tadbirni Ichki ishlar vaziri, general-leytenant Poʻlat Bobojonov ochib, tinchlik-osoyishtalikni taʼminlashda ichki ishlar organlari xodimlari tomonidan koʻrsatilayotgan fidoyilik davlatimiz rahbari tomonidan hamisha eʼzozlanishini taʼkidladi.
Shundan soʻng, qonun ustuvorligini taʼminlash, jamoat tartibini mustahkamlash borasidagi sharafli burchini bajarish chogʻida mardlik, jasorat va fidoyilik koʻrsatgani, sohada yuqori malakali kadrlarni tayyorlash, yosh avlodni ona Vatanga muhabbat va sadoqat ruhida tarbiyalash yoʻlidagi koʻp yillik samarali mehnati hamda ijtimoiy hayotdagi faol ishtiroki uchun bir guruh Ichki ishlar organlari xodimlariga davlat mukofotlari, shuningdek, idoraviy koʻkrak nishonlari, esdalik qoʻl soatlari, faxriy yorliqlar, maxsus unvonlar, qimmatbaho sovgʻalar tantanali topshirildi.
Bundan tashqari, yuksak eʼtirofga sazovor boʻlgan fidoyi xodimlar soʻzga chiqib, Yurtboshimiz tomonidan bildirilgan ishonch ularga yanada masʼuliyat yuklashini hamda xalqimiz osoyishtaligi yoʻlida doimo kamarbasta ekanligini bildirishdi.
Soʻz mukofotlanganlarga
Murodilla Alikariyev – Toshkent shahar Ichki ishlar bosh boshqarmasi boshligʻining jamoat tartibini saqlash boʻyicha oʻrinbosari, polkovnik, “Mardlik” ordeni sohibi: – Tinch yurtga bayram va tantanalar yarashadi. Ajib shukronalik va yurtga daxldorlik tuygʻularini oʻzida aks ettirgan bu yilgi hurlik shodiyonalari “Bir boʻlsak – yagona xalqmiz, birlashsak – Vatanmiz!” shiori ostida qarshi olinganligida ham ramziy maʼno mujassam.
Albatta, berilgan bunday yuksak eʼtibor va gʻamxoʻrlik har bir xodimga tunu kun oʻz ustida ishlash, jamoat xavfsizligini taʼminlash uchun barcha kuch-vositalarni safarbar etish majburiyatini yuklaydi. Kamtarona mehnatimiz yuqori baholanganidan baxtiyorman. Bundan keyin ham boʻshashmaymiz!
Eldor Gulyamov – IIV Transport va turizm obyektlarida xavfsizlikni taʼminlash departamenti batalyon komandiri, podpolkovnik, “Sodiq xizmatlari uchun” medali sohibi: – Ichki ishlar organlariga qabul qilinganimga 30-yildan oshibdi. Shuncha yillik xizmatimizga berilgan bu katta eʼtibor uchun, avvalo, muhtaram
Prezidentimizga, vazirlik rahbariyatiga hamda men bilan yelkama-yelka faoliyat olib borayotgan hamkasblarimga minnatdorlik izhor etaman. Bu yangilik nafaqat oila aʼzolarimni, yaqinlarimni, balki departamentdagi barchani birdek xursand qildi. Hammaga men kabi eʼtirof va eʼtiborda boʻlish nasib qilsin.
Gʻolib Karimov – Jizzax viloyati Sharof Rashidov tumani IIB profilaktika katta inspektori, kapitan, “Shuhrat” medali sohibi: – Mukofotlanganimni eshitgan koʻpchilik meni tabriklashdi.
Ayniqsa, ota-onam men bilan faxrlanishlarini aytishganida, kasbimni toʻgʻri tanlaganimga yana bir bor amin boʻldim. Men xizmat faoliyatimni “Ravalliq” mahallasida olib boraman. 7800 nafardan ortiq aholi istiqomat qiladigan ushbu hudud oʻtgan yili qizil toifada edi.
Qilingan izchil mehnatlar samarasi oʻlaroq bu yil yashil toifaga oʻtishiga erishdik. Yil boshidan hozirgacha bironta jinoyat sodir etilmadi. Mahalla yettiligi bilan samarali faoliyatni yoʻlga qoʻyganmiz. Ushbu yuksak mukofotga faqat aʼlo natijalarimiz orqali labbay deb javob berishimiz kerak deb oʻylayman!
©️ “Postda” gazetasi, Abror Poyonov va Abu Kenjayev.