Ichki ishlar vaziri general-leytenant Poʻlat Bobojonov boshchiligidagi vazirlik delegatsiyasi Qirgʻiz Respublikasining Choʻlpon-Ota shahrida Turkiy davlatlar tashkiloti ishtirokchi - davlatlar ichki ishlar vazirlarining birinchi yigʻilishida ishtirok etdi
2024-09-06 17:00:00 / Yangiliklar
Oʻzbekiston Respublikasi Ichki ishlar vaziri general-leytenant Poʻlat Bobojonov boshchiligidagi vazirlik delegatsiyasi joriy yilning 6-sentyabr kuni Qirgʻiz Respublikasining Choʻlpon-Ota shahrida Turkiy davlatlar tashkiloti ishtirokchi - davlatlar ichki ishlar vazirlarining birinchi yigʻilishida ishtirok etdi.
Tadbirda mamlakatimiz qatori Ozarbayjon, Qozogʻiston, Qirgʻiziston va Turkiya ichki ishlar vazirlari, shuningdek Turkiy davlatlar tashkiloti Bosh kotibi Kubanichbek Omuraliyev boshchiligidagi soha mutaxassislaridan iborat delegatsiyalar qatnashdilar.
Tomonlar, mazkur formatdagi tadbir, ishtirokchi mamlakatlar xalqlarining tarixiy aloqalari, umumiy tili, madaniyati va anʼanalariga asoslanib, turkiy xalqlarning maʼnaviy yaqinlashuviga, qardoshlik birligini mustahkamlashga koʻmaklashish, har tomonlama hamkorlikni yanada rivojlanishiga katta xissa qoʻshishini alohida taʼkidladilar.
Tadbir jarayonida ishtirokchilar, tashkilot doirasidagi mamlakatlarda jinoyatchilikka, shu jumladan, ekstremizm, odam savdosi, kiberjinoyatlar, narkotik moddalarning noqonuniy muomalasi hamda noqonuniy migratsiyaga qarshi kurashish masalalarini muhokama qilib, ichki ishlar vazirliklarining mazkur yoʻnalishlardagi tegishli boʻlinmalar hamkorligining istiqbollarini belgilab olishdi.
Doʻstona va konstruktiv ruhda oʻtgan tadbirda tomonlar, mazkur formatdagi uchrashuvlar idoralar oʻrtasidagi hamkorlikni mustahkamlashga xizmat qilishiga alohida urgʻu berib, Turkiy davlatlar tashkiloti ichki ishlar vazirlari birinchi yigʻilishining Deklaratsiyasini imzoladilar.
IIV Xalqaro hamkorlik boshqarmasi