Ichki ishlar vazirligi akademiyasida magistratura tinglovchilarining bitiruv marosimiga bagʻishlangan tantanali tadbir boʻlib oʻtdi
2024-08-06 11:10:00 / Yangiliklar
Unda Ichki ishlar vazirligi rahbariyati, taʼlim muassasasi vakillari hamda ommaviy axborot vositalari xodimlari ishtirok etdi.
Tadbirni akademiya boshligʻi Rustam Xatamov ochib, muhtaram Prezidentimiz rahbarligida ichki ishlar organlari tizimida amalga oshirilayotgan keng koʻlamli islohotlarni eʼtirof etdi. Keyingi yillarda soha uchun kadrlar tayyorlash jarayonlari yangi bosqichga olib chiqilgani, akademiyada bakalavriat va magistraturadan iborat ikki bosqichli taʼlim tizimi samarali yoʻlga qoʻyilgani taʼkidlandi.
Taʼlim muassasasi rahbari magistraturaning ustuvor jihatlariga toʻxtalar ekan, oʻquv jarayoniga tatbiq qilingan ilgʻor yondashuvlar tinglovchilarni ichki ishlar organlarining asosiy faoliyat yoʻnalishlarini boshqarishga qodir universal rahbar etib tayyorlashda muhim ahamiyat kasb etayotganini qayd etdi.
Shundan soʻng «tashkiliy-strategik boshqaruv» hamda «tashkiliy-taktik boshqaruv» yoʻnalishlarini tamomlagan tinglovchilarga birinchi va ikkinchi darajali magistr-yurist malakasi beruvchi diplomlar tantanali ravishda topshirildi.
Ichki ishlar vaziri oʻrinbosari, general mayor Davron Nazarmuhammedov bitiruvchilarni tabriklab, hozirgi islohotlar davrida rahbar kadrlar oldida dolzarb vazifalar turganini alohida taʼkidladi. «Tizim xalqchilligini taʼminlash barcha boʻgʻindagi rahbarlarga bogʻliq. Buning uchun har bir rahbar oʻz faoliyatini tanqidiy baholab borishi, xalqimizning dardu tashvishi bilan yashashi, yetuk bilimi, boshqaruv salohiyati va maʼnaviy-axloqiy fazilatlarini namoyon etib, zimmasidagi ishonchni munosib oqlashi kerak. Sizlar yangi avlod kadrlari sifatida ana shunday masʼuliyatli yoʻl oldida turibsiz», dedi u.
Tadbirda bitiruvchilar nomidan Temurbek Altmishev va Abdumalik Majidovlar soʻzga chiqib, akademiyadagi zamonaviy taʼlim jarayonlari, tinglovchilar uchun yaratilgan imkoniyat va sharoitlarni eʼtirof etdilar. Safdoshlarining ona Vatanimiz va xalqimizga yuksak sadoqat bilan xizmat qilish yoʻlidagi sharafli xizmat faoliyatlariga muvaffaqiyat tiladilar.
IIV akademiyasi Axborot xizmati