O‘zbеkiston Rеspublikаsi Ichki ishlаr vаzirligi

«Paxta ishi», «Oʻzbek ishi» haqida gap borganda, minglab yurtdoshlarimizning qiyinchiliklar va azob-uqubatga toʻla, ruhiy hamda jismoniy tazyiq ostidagi hayoti koʻz oʻngimizda gavdalanadi. Garchi bu qatagʻondan jabr chekkanlarning koʻpchiligi hozirgi kunga kelib olamdan oʻtgan boʻlsa-da, ularning yaqinlari va farzandlari mashʼum voqealarni hech qachon unutmaydi. Mana shunday adolatsizliklardan jabr chekkanlardan biri oʻsha yillari Zarafshon shahar IIBga rahbarlik qilgan Nabi Rahimovdir.

U 1934-yili Tojikistonning hozirgi Sugʻd viloyatida dunyoga kelgan. Ota-onasi gʻoyat maʼrifatli insonlar boʻlib, farzandlarini ham bilim olishga, kitob oʻqishga qiziqtirib tarbiyalashdi. Nabi Rahimovning bolaligi Ikkinchi jahon urushi davriga toʻgʻri keldi. Ijtimoiy-moddiy qiyinchiliklar uni sabrli, chidamli boʻlishga oʻrgatdi.

N. Rahimov 1955-yili Panjikent pedagogika bilim yurtini tamomladi. Unda bolalarga bilim berish, ularni ortidan ergashtirish qobiliyati kuchli edi. Pedagoglik bilan shugʻullanayotib, kutilmaganda ichki ishlar organlari sohasiga qiziqib qoldi. Bilimli-zakovatli, jismonan baquvvat, boʻychan va shijoatga toʻla bu yosh yigitni xizmatga qabul qilishdi.

1961-yildan Tojikistonning Sugʻd viloyati Panjikent tumanida uchastka noziri vazifasida tizimdagi faoliyatini boshladi. Keyinroq Navoiy viloyatining Tomdi tumani IIB jinoyat qidiruv guruhida katta inspektor lavozimida xizmatni davom ettirdi.

1975-yilda IIV Toshkent oliy militsiya maktabini muvaffaqiyatli yakunlagach, intiluvchanligi tufayli Nabi Rahimovning lavozimi ham, unvoni ham ortib boraverdi. U 1985-yilgacha Zarafshon shahar Ichki ishlar boʻlimi boshligʻi lavozimida faoliyat olib bordi. Ana shu davrda viloyat IIB rahbari Toʻra Hayitov ustidan qoʻzgʻatilgan jinoyat ishi boʻyicha tergovga jalb etildi.

— Nabi Rahimovni 1979-yilda Zarafshon shahrida yoʻl-patrul xizmati inspektori vazifasida ishlayotgan paytimdan tanirdim. U kishi oʻsha paytlar shahar IIB boshligʻining oʻrinbosari edilar. Keyinchalik Zarafshon shahar IIB rahbari boʻldilar. Xizmat borasida qattiqqoʻl, talabchan boʻlsalar-da, har bir xodimdan hol soʻrab, gʻamxoʻrlik ham koʻrsatardilar. Biz kabi yosh xodimlarga «oʻgʻlim» deb murojaat qilardilar.

Keyinchalik shaxsiy tarkib orasida «Podpolkovnik Nabi Rahimovning qingʻir ishlari bor ekan», degan mish-mishlar tarqala boshladi. Baʼzilar bir gapga oʻnta qoʻshib gʻiybat qilsalar, uni yaqindan bilganlar bu gaplar boʻhton ekanligini sezib, bosh chayqab qoʻyishardi. Ammo gdlyanchilarga qarshi chiqishga hech kimning yuragi betlamasdi. Nabi Rahimovga bu koʻrgiliklar ogʻirlik qildi. Oxiri lavozimidan boʻshatilganini, xasta oʻlib qolganini eshitdik, deydi isteʼfodagi mayor Zamon Ochilov.

Tergov jarayoni bir necha yil davomida uydirma va tuhmatlarga toʻla ruh iy hamda jismoniy tazyiqlar ostida kechdi. Ahvol shu darajaga borib yetdiki, hatto Nabi Rahimov millati tojik boʻlgani uchun kamsitildi ham. Oila aʼzolarining ham tinchi buzildi. Bunday bedodliklardan yuragini oldirib qoʻygan podpolkovnik Nabi Rahimov navbatdagi unvonni olish uchun viloyat IIB boshligʻiga pora berganligi toʻgʻrisida yolgʻon koʻrsatma berishga majbur boʻldi.

Otamning tushkunlikda kechgan 2-3-yillik hayoti uni ogʻir xastalikka duchor qildi qandli diabet va yurak yetishmovchiligi kasalliklariga chalinib qoldi. Bu oʻz navbatida oilamizning turmush sharoiti ogʻirlashishiga sabab boʻldi. Kasalmand singlim Mayyani ham oʻz vaqtida davolata olmadik. Gdlyanchilarning qatagʻon siyosati sabab otamning koʻngli kasbidan sovidi. 1985-yil turli vajlar bilan lavozimidan ozod etilganidan soʻng, boshqa sohaviy xizmatlarda faoliyat olib bordi, deydi uning oʻgʻli Farhod Rahimov.

Maxsus komissiya tomonidan Nabi Rahimovning ishi qayta koʻrilib, adolatsizlik qurboni ekanligi tan olinganiga qaramay, endi xastalik sabab u xizmatni davom ettirolmadi. 1989-yilda kasalligi sababli pensiyaga chiqqan Nabi Rahimov 1995-yil 6-aprel kuni 61 yoshida vafot etdi.

Mahliyo Xolova oʻz muxbirimiz. «Postda»
Navoiy viloyati