Ichki ishlar vaziri boshchiligidagi ishchi guruh tungi vaqtda poytaxtimizning Chilonzor va Uchtepa tumanlarida oʻrganish ishlarini olib bordi
2024-07-30 11:30:00 / Yangiliklar
Ichki ishlar vaziri rahbarligidagi ishchi guruh tomonidan Toshkent shahrining Chilonzor va Uchtepa tumanlarida ichki ishlar boʻlimlari shaxsiy tarkibi tomonidan jamoatchilik bilan hamkorlikda tungi vaqtlarda tashkil etilayotgan ishlar va hududlarda amalga tatbiq etilayotgan xavfsizlik choralari tizimli ravishda oʻrganish davom etmoqda.
Tadbir davomida Chilonzor tumani Bunyodkor koʻchasida joylashgan «Integro» savdo-koʻngilochar majmuasida xizmatni tashkil etish, fuqarolar xavfsizligini qay darajada taʼminlanganligi hamda majmuada aholi uchun yaratilgan shart-sharoitlar oʻrganildi.
Majmuaga xavfsizlikni taʼminlashga jalb qilingan xodimlarning axborotlari tinglandi, xodimlarning huquqbuzarliklarni oldini olish boʻyicha tezkor shaylik holati nazorat tariqasida tekshirildi, shuningdek huquqni muhofaza qiluvchi organlari bilan hamkorlikda xizmatni tashkillashtirish borasida tegishli koʻrsatmalar berildi.
Tadbir davomida ishchi guruh tomonidan Chilonzor tumanida dislokatsiya qilingan Toshkent shahar Qoʻriqlash boshqarmasi tumanlararo boʻlinmasi faoliyati oʻrganildi.
Jarayonda, xizmatga jalb etilgan shaxsiy tarkib va biriktirilgan kuch va vositalarning shayligi, shuningdek ularning tezkor vaziyatni barqarorligini taʼminlashga tayyorgarligi tekshirilib, xizmat faoliyatini takomillashtirish yuzasidan aniq vazifalar berildi.
Oʻrganishlar davomida tumanning «Al-Xorazmiy» mahallasida mahalla faollari bilan uchrashib, mahallada aholi osoyishtaligini taʼminlash boʻyicha tashkil etilgan ishlar bilan tanishildi. Jarayonda, mahallada amalga oshirilayotgan ishlarning amaliy natijalari namoyish etildi.
Amalga oshirilayotgan ijobiy ishlar natijasida mahalla hududida jinoyatlar soni qariyb ikki barobar kamaygani, ishchi guruh tomonidan alohida eʼtirof etildi. Mahalla aholisi va yoshlarning kitobxonlik savodini oshirish maqsadida mahalla idorasi kutubxonasi koʻzdan kechirildi, kitob fondini koʻpaytirish boʻyicha tavsiyalar berildi.
Tekshiruv davomida ishchi guruh aʼzolari Uchtepa tumani ijtimoiy-iqtisodiy rivojlantirish boʻyicha 3-sektor shtabi faoliyati, masʼullarning ish jarayoni hamda xodimlarga yaratilgan sharoitlari bilan ham tanishildi.
Asosiy eʼtibor, hamkor tashkilotlar bilan birgalikda namunaviy xizmat oʻtash modellarini amalga kiritilishi, mahallarda shaxsiy xonadonlar va jamoat joylarida videokuzatuv qamrovi oshirilishi, shahar yoʻllarida xavfsiz harakatlanish, piyodalar ayniqsa bolalar, yoshlar va ayollar xavfsizligini taʼminlash boʻyicha koʻrilayotgan chora-tadbirlarga qaratildi.
Shuningdek ishchi guruh aʼzolari tumanning «Oʻrikzor» mahallasi Samarabonu koʻchasida ilgari qarovsiz boʻlgan hudud obodonlashtirib, sayilgohga aylantirilgan manzilni hamda tumanning «Sarakoʻl», “Ю.Саккокий”, «Zarafshon» mahallalari hududlari va «Oʻrikzor» savdo majmuasiga xizmat koʻrsatuvchi yangi barpo etilgan Huquq tartibot maskani bilan tanishdilar.
Oʻrganish jarayonida, aniqlangan barcha kamchiliklar tanqidiy muhokama qilinib, kelgusida xizmat faoliyatini takomillashtirishga oid maqsadli chora-tadbirlar belgilab olindi.