Fargʻona viloyati ichki ishlar boshqarmasida joriy yilning 6 oylik yakunlari sarhisobiga bagʻishlangan tahliliy yigʻilish boʻlib oʻtdi
2024-07-22 00:55:00 / Yangiliklar
Fargʻona viloyati ichki ishlar boshqarmasida Ichki ishlar vaziri oʻrinbosari, Jamoat xavfsizligi xizmati rahbari, general-mayor Bekmurod Abdullayev hamda boshqarma boshligʻi, general-mayor Azizbek Ikramovlar ishtirokida 2024-yilning 6 oylik yakunlariga bagʻishlangan tahliliy yigʻilish oʻtkazildi.
Videomuloqot tarzida tashkil etilgan tadbirning markaziy studiyasida viloyat IIB boshligʻining oʻrinbosarlari, barcha sohaviy xizmat rahbarlari, shahar-tuman studiyalarida esa ichki ishlar boʻlimlari boshliqlari, ularning oʻrinbosarlari, boʻlinma boshliqlari hamda tegishli mutasaddi xodimlar ishtirok etdilar.
Yigʻilishda boshqarma boshligʻining birinchi oʻrinbosari tomonidan oʻtgan olti oy davomida viloyatda jamoat xavfsizligini taʼminlash, jinoyatchilikni jilovlash va hududlarni raqamlashtirish borasida amalga oshirilgan keng koʻlamli ishlar yuzasidan hisobot berildi.
Qayd etilganidek, viloyatda umumiy jinoyatchilik salmogʻi avvalgi yillarga nisbatan sezilarli darajada kamaygan boʻlsada, ayrim jinoyat turlari oshib ketishiga yoʻl qoʻyilgan.
Berilgan hisobot hamda jinoyatchilik tahlilidan kelib chiqib, baʼzi jinoyat turlari oshgan shahar-tuman mutasaddi rahbarlariga profilaktik ishlarni yanada kuchaytirish boʻyicha aniq koʻrsatma hamda topshiriqlar berildi.
Yigʻilishda soʻzga chiqqan general-mayor Bekmurod Abdullayev jinoyatchilik va huquqbuzarliklarning barvaqt oldini olish, jamoat xavfsizligini taʼminlash, «Obod va xavfsiz mahalla» Konsepsiyasini amaliyotga joriy etish, «qizil» toifadagi mahallalar bilan ishlashda eʼtibor qaratilishi zarur boʻlgan ustuvor vazifalarga toʻxtalib, oʻzining zarur takliflarini bildirdi.
Tadbir yakunida viloyat hududida jamoat tartibini saqlash, fuqarolar xavfsizligini taʼminlash, jinoyatchilikni jilovlashda hamkasblariga har tomonlama oʻrnak boʻlayotgan bir guruh xodimlar hamda yoshlarga oʻz tajribalarini oʻrgatib kelayotgan soha faxriylari munosib eʼtirof etildi.
Ularning bir guruhiga viloyat ichki ishlar boshqarmasining tashakkurnomasi va qimmatbaho esdalik sovgʻalari topshirildi.
IIV JXD Axborot xizmati