IIV Tezkor-qidiruv departamenti tomonidan DXX bilan hamkorlikda oʻtkazilgan tezkor tadbirda Boʻstonliq tumanida joylashgan dala hovlida katta miqdordagi kuchli taʼsir qiluvchi dori vositalarini tayyorlash va tarqatish bilan shugʻullanib kelayotgan jinoiy guruh qoʻlga olindi.

Oʻzbekiston Respublikasi IIV Tezkor qidiruv departamenti, DXX, Toshkent viloyati va Toshkent shahar IIBB xodimlari tomonidan Boʻstonliq hamda Yashnobod tumanlarida tezkor tadbirlar oʻtkazildi.

1997 va 2003-yilda tugʻilgan ikki nafar shaxs Boʻstonliq tumani hududidagi dala hovlida tarkibida kuchli taʼsir qiluvchi moddalarni qoʻlbola usulda qadoqlash bilan shugʻullanib kelayotganligi aniqlanib, manzildan 13 kg 500 gramm (45 ming dona) Pregabalin hamda 20 litr (2 ming dona) Tropikamid moddalari, shuningdek 60 ming dona atrofida Tropikamid va Pregabalin dori vositalarining boʻsh kapsula hamda flakonlari ashyoviy dalil sifatida olindi.

Tezkor-qidiruv tadbirlari davom ettirilib, qoʻlga olingan shaxslarga katta miqdorda dori vositalarini olib kelgan, 1998 va 1993-yilda tugʻilgan, ikki nafar kuryerlar «Neksiya-3» rusumli, avtomashinada Toshkent shahri Yashnobod tumani hududida ketayotgan vaqtida ushlanib, haydovchining yonidan 10 dona «Pregabalin» kuchli taʼsir qiluvchi dori vositasi olindi.

Dastlabki tezkor-surishtiruv ishlari davomida, ushlangan shaxslar telegram messenjerida tashkil etilgan kanalda «dori vositalarini qadoqlovchi» va «yetkazib beruvchi» sifatida ishlayotganligi, maʼlum boʻldi.

Oʻtkazilgan tezkor tadbir davomida ushlangan 4 nafar shaxsdan 3 mlrd 300 mln soʻmlik jami 13 kg 500 gramm (45 ming dona) Pregabalin va 20 litr (2 ming dona) Tropikamid kuchli taʼsir qiluvchi dori vositalari olindi.

Holat yuzasidan IIV huzuridagi Tergov departamenti tomonidan jinoyat kodeksining 251 prim 1 -moddasi bilan jinoyat ishi qoʻzgʻatilib, tergov harakatlari olib borilmoqda.

IIV Tezkor qidiruv departamenti