Xodimlar oʻrtasida jismoniy tarbiya va sportni ommalashtirish, sogʻlom turmush tarzini targʻib qilish hamda mamlakatimizni xalqaro sport maydonlarida munosib ishtirok etishini taʼminlash maqsadida turli sport tadbirlari, musobaqalar tashkil etilmoqda. Xususan, huquqni muhofaza qiluvchi organlari xodimlari oʻrtasida sportning “Armrestling” turi boʻyicha Navoiy viloyati IIB boshligʻi kubogi boʻlib oʻtdi.

Dinamo jismoniy tarbiya va sport jamiyati bilan hamkorlikdagi sport musobaqasida huquqni muhofaza qiluvchi organ xodimlari ishtirok etib kuch sinashdilar. Bellashuv mutaxassislar tomonidan baholanib borildi.

Umumjamoa hisobida faxrli 3-oʻrin viloyat Favqulodda vaziyatlar boshqarmasi jamoasiga, 2-oʻrin Davlat xavfsizlik xizmati viloyat boshqarmasiga nasib etdi. 1-oʻrinni viloyat Ichki ishlar boshqarmasi xodimlaridan iborat jamoa qoʻlga kiritdi.

Turli vazn toifasida gʻoliblikni qoʻlga kiritgan xodimlar diplom, medal va qimmatbaho sovgʻalar bilan taqdirlandi. Birinchilikni qoʻlga kiritganlarga boshqarma boshligʻining kubogi tantanali ravishda topshirildi.

Navoiy viloyati IIB Axborot xizmati