Buxoro viloyati Ichki ishlar boshqarmasida “27-iyun – Matbuot va ommaviy axborot vositalari xodimlari kuni” munosabati bilan tantanali tadbir tashkil etildi
2024-06-30 11:45:00 / Yangiliklar
Tadbirda Buxoro viloyati Ichki ishlar boshqarmasi rahbariyati, tegishli sohaviy xizmatlar rahbarlari hamda OAV vakillari ishtirok etdilar.
Dastlab, Ichki ishlar boshqarmasi boshligʻi oʻrinbosari podpolkovnik Akbar Yusupov, boshqarma boshligʻi podpolkovnik Ikromjon Tursunovning bayram tabrigini oʻqib eshittirdi.
Jarayonda, soʻz erkinligini amalga oshirish va himoya qilish yoʻlida jonbozlik koʻrsatib, jamiyatimizda demokratik qadriyatlarni qaror toptirish, fuqarolarimizning axborot sohasidagi konstitutsiyaviy huquqlarini taʼminlash, jamiyatda huquqiy ong va huquqiy madaniyatni yuksaltirish, dunyoda va mamlakatimizda sodir boʻlayotgan ijtimoiy-siyosiy jarayonlar, voqea-hodisalar haqida tezkor va haqqoniy maʼlumotlarni tarqatish, ayniqsa Ichki ishlar organlari faoliyati bilan bogʻliq amalga oshirilayotgan islohotlarni keng omma eʼtiboriga yetkazish borasidagi OAV vakillarining koʻrsatayotgan xizmatlari alohida eʼtirof etildi.
Tadbir davomda boshqarma boshligʻining tegishli buyurigʻiga koʻra IIB Axborot xizmati hamda YHXB matbuot guruhi xodimlari pul mukofoti bilan taqdirlandilar.
Shundan soʻng, aholiga tezkor va ishonchli axborot yetkazib berish, viloyatimizdagi mavjud keng va qulay imkoniyatlarni respublika matbuoti, televideniye, radio va internet sahifalarida faol targʻib etilishida benazir hissa qoʻshib kelayotgan bir guruh soha xodimlari, boshqarma boshligʻining, tashakkurnoma hamda qimmatbaho esdalik sovgʻalari bilan taqdirlandilar.
Buxoro viloyati IIB Axborot xizmati