Samarqand viloyati Ichki ishlar boshqarmasi boshligʻi polkovnik Rahmat Mamatov tizimdagi yosh xodimlar bilan uchrashuv oʻtkazdi
2024-06-30 11:40:00 / Yangiliklar
Ilmga intilish, fan sirlarini oʻrganish, mehnat qilish insonni komillikka eltadi. Orzu bilan yashab, maqsad sari intilgan kishi muvaffaqiyatlarga erishadi.
Samarqand viloyat ichki ishlar boshqarmasi boshligʻi Rahmat Mamatov tizimda xizmat olib borayotgan yosh xodimlar bilan uchrashuv doirasida ana shunday soʻzlarni alohida taʼkidladi. "30-iyun –Yoshlar kuni" munosabati bilan tashkil etilgan mazkur uchrashuvda yurtimizda yoshlarga juda katta eʼtibor berilayotgani, bundan esa kelajagimiz bunyodkorlari boʻlgan yoshlar unumli foydalanishlari zarurligi qayd etildi.
Yoshlarni ham maʼnan, ham jismonan barkamol qilib tarbiyalash barchaning birday vazifasi va masʼuliyati hisoblanadi. Ichki ishlar libosini kiyib masʼuliyat va sharaf ila osoyishtalik yoʻlida xizmat qilayotgan yosh xodimlarga yurtni sevish, uning tinchligini taʼminlash borasida ahamiyat qaratishi lozim boʻlgan jihatlar, kasbini aziz koʻrib, burchiga sadoqat bilan faoliyat olib borishi xususida gapirildi.
Boshqarma boshligʻi Oʻzbekiston ulkan imkoniyatlar mamlakatiga aylangani, har bir yosh munosib qoʻllab-quvvatlanayotgani, ularning muammo va masalalari hal etilayotgani, taklif va tashabbuslarini yuzaga chiqarishda koʻmaklashilayotgani, iqtidor va isteʼdodi ragʻbat topayotganligini hayotiy misollar orqali tushuntirdi. Oʻz navbatida yoshlar davlatimiz rahbarining yoshlarga bildirgan ishonchini aql-zakovati, yuksak tafakkuri, intilishlari orqali oqlashlari lozimligini qayd etdi. Tizimda xizmat olib borayotgan yosh xodimlarni oʻz ustida ishlash, bilim olishdan toʻxtamaslik, mutolaaga oshno boʻlish, kasbiy mahorat va koʻnikmalarini boyitib borishga daʼvat etdi. Shuningdek, tizimda chet tillarini biladigan yosh xodimlar sonini ikki barobarga koʻpaytirish, yosh kadrlar zaxirasini shakllantirish, yoshlar kengashini tashkil qilish borasidagi rejalar xususida ham maʼlumot berildi.
Bundan tashqari, biz bilan bir safda xizmat qilib kelayotgan, Samarqand viloyati Ichki ishlar boshqarmasi Xavfsiz Turizmni taʼminlash boshqarmasi jamoat tartibini saqlash boʻlimi inspektori kichik serjant Baxromov Islom Ismoiljon oʻgʻli, Parijda boʻlib oʻtadigan 33-Olimpiya oʻyinlariga yoʻllanmani qoʻlga kiritgani eʼtirof etildi.
Uchrashuv doirasida yoshlarni qiziqtirgan savollarga atroflicha javoblar qaytarildi.
Samarqand viloyati IIB Axborot xizmati