Ichki ishlar vazirligi Maxsus operatsiyalarni muvofiqlashtirish boshqarmasining Portlash xavfi boʻlgan predmetlarni zararsizlantirish va oldini olish maxsus otryadi mutaxassis xodimlari tomonidan Malaka oshirish institutida amaliy koʻrgazmali oʻquv mashgʻuloti oʻtkazildi.

Mashgʻulotda «Fuqarolar bilan ishlash moduli» boʻyicha Ichki ishlar organlarining post-patrul xizmati, yoʻl-patrul xizmati, huquqbuzarliklar profilaktikasi xizmati yoʻnalishlarida tahsil olayotgan 180 nafar tinglovchilar qatnashdi.

Amaliy koʻrgazmali oʻquv mashgʻulotida IIV Maxsus operatsiyalarni muvofiqlashtirish boshqarmasi Metropolitenda Portlash xavfi boʻlgan predmetlarni zararsizlantirish va oldini olish maxsus otryadi mutaxassis xodimlari tomonidan turli portlovchi predmetlar, ularni zararsizlantirishda foydalaniladigan zarur texnikalar, robotlar, qurol-aslahalar hamda jangovar vaziyatlarda foydalaniladigan maxsus avtomashinalar toʻgʻrisida maʼlumotlar berildi.

Tinglovchilar oʻzlarining qiziqtirgan savollariga javob oldilar.

IIV Malaka oshirish instituti