Yangi avlod kadrlari sharafli xizmatga yoʻl oldi
2024-06-22 20:45:00 / Yangiliklar
Ichki ishlar vazirligi akademiyasi bitiruvchilari sharafli xizmatga yoʻl olish oldidan poytaxtimizdagi “JAR” stadionida saf tortdilar. Yosh leytenantlarga diplom topshirish marosimiga bagʻishlangan tadbirda Ichki ishlar vazirligi rahbariyati, qator davlat organlaridan mehmonlar, keng jamoatchilik vakillari hamda ommaviy axborot vositalari xodimlari ishtirok etdi.
Tadbir avvalida akademiya boshligʻi, polkovnik Rustam Xatamov yigʻilganlarni tarixiy sana bilan qizgʻin qutladi. Shundan soʻng bitiruvchilarga tantanali ravishda diplomlar topshirildi.
Bitiruv tadbirida ichki ishlar vaziri, general-leytenant Poʻlat Bobojonov nutq soʻzlab, inson qadri ulugʻlangan yurtimizda kechayotgan ulkan oʻzgarishlar, ichki ishlar organlarini xalqchil tuzilmaga aylantirish borasida olib borilayotgan islohotlarga toʻxtaldi. Keyingi yillarda soha uchun kadrlar tayyorlash jarayonlari ham tubdan isloh qilingani, akademiyada yoʻlga qoʻyilgan ilgʻor yondashuvlar yangi avlod ichki ishlar xodimlarini tayyorlashda muhim omil boʻlayotgani aytildi.
– Muhtaram Prezidentimiz tizimdagi islohotlar taqdirini yuksak malakali, zamonaviy fikrlaydigan, oʻz kasbiga, Vatanimiz va xalqimizga sodiq kadrlar belgilab beradi, deya alohida taʼkidlab oʻtdilar. Sizlar vatanparvarlik, bilim va tafakkur, shijoat va mardlikda buyuk ajdodlarimizga munosib voris boʻlib, ichki ishlar organi xodimi degan sharafli nomga loyiq boʻlishingiz kerak, – dedi Poʻlat Bobojonov.
Bitiruvchilarni Oliy Majlis Senatining Mudofaa va xavfsizlik masalalari qoʻmitasi raisi Qutbiddin Burhonov ham tabrikladi. “Yangi Oʻzbekistonni xalqparvar ijtimoiy davlat sifatida ravnaq toptirish, jamiyatda inson qadrini ulugʻlash, qonun ustuvorligini mustahkamlash barcha sohalar qatori, ichki ishlar organlariga ham ulkan masʼuliyat yuklaydi. Bu esa sizlar kabi bilimli, shijoatli, oʻz Vatanini sevadigan va unga daxldorlik bilan yashaydigan kadrlarga bogʻliq. Yurt ravnaqi yoʻlida xizmat qilishdan aslo charchamang”, dedi u.
Oliy Majlis Qonunchilik palatasi Spikerining birinchi oʻrinbosari, Inson huquqlari boʻyicha Oʻzbekiston Respublikasi Milliy markazi direktori, akademik Akmal Saidov soʻz olar ekan, shunday dedi: “Bugungi tadbirda bitiruvchilarimizdan baxtli inson yoʻq. Chunki ular Yangi Oʻzbekistonning yangi ichki ishlar organi xodimlari sifatida xizmatga qadam qoʻymoqda. Yoshlarimiz bilan suhbat qurib amin boʻldimki, ularning kelajak maqsadlari ulkan. Ishonchim komil, bugun koʻzlari yonib turgan oʻgʻil-qizlarimizdan generallar, olimlar, akademiklar yetishib chiqadi. Yoshlarga qarata uchta tilakni aytgan boʻlardim: avvalo vatanparvar boʻling, Konstitutsiya va qonunlarni hurmat qiling, ikkinchidan, sohangizning yetuk mutaxassisi boʻling, uchinchidan, xorijiy yillar chuqur oʻrganib, jahondagi ilgʻor tajribalardan boxabar boʻlib yuring. Shunda maqsadingizga albatta erishasiz”.
Tantanali tadbirda yoshlarning buguni va kelajak taqdiri yoʻlida yaratilayotgan ulkan imkoniyatlar, fidoyi va tashabbuskor yoshlar qoʻlga kiritayotgan yutuqlar eʼtirof etildi. Bitiruvchilar chinakam xalqparvar xodim sifatida ona Vatanimiz va xalqimizga yuksak sadoqat bilan xizmat qilishi zarurligi taʼkidlandi.
– Oʻgʻlim Shuhratjonning oʻzi orzu qilgan oʻquv dargohini muvaffaqiyatli tamomlagani yoshlarga berilayotgan yuksak eʼtiborning samarasidir. Yurt osoyishtaligini asrash, xalqimiz tinchligini taʼminlash, inson manfaatlarini himoya qilish ichki ishlar xodimlarining sharafli burchi sanaladi. Adolat, poklik, fidoyilik bitiruvchilarimizning hayot mezoni boʻlsin, ana shunday jasur oʻgʻil-qizlarimiz bilan butun xalqimiz faxrlanib yursin, – dedi ota-onalar nomida soʻzga chiqqan Nargiz Chinaliyeva.
Bayramona oʻtgan tadbir ona yurtimizni madh etuvchi qoʻshiqlar bilan koʻtarinki ruhda yakunlandi.
IIV akademiyasi Axborot xizmati