Chekka qishloqlarda
2024-06-17 15:00:00 / Yangiliklar
Bir oy davomida ichki ishlar organlari, Milliy gvardiya, Mudofaa vazirligi hamda DXX tizimidagi harbiy qismlar, tuman favqulodda vaziyatlar, tibbiyot, Oʻrmon xoʻjaligi, kommunal tizim vakillari hamda mahallalar yettiliklaridan iborat 5 ta guruh tomonidan Zomin tumanining Tojikiston Respublikasi bilan chegaradosh hududlarida qonunbuzarliklarning oldini olish, jinoyatlarni fosh qilish, aholining ijtimoiy-iqtisodiy muammolariga yechim topish maqsadida tezkor profilaktik tadbirlar oʻtkazildi.
Chunonchi, «Chilonzor», «Baxt», «Istiqlol», «Chorvador», «Turkman», «Duoba» aholi punktlaridagi 124 ta tashkilot, korxona, muassasa, 4 ming 211 ta turarjoy hamda 13 soʻqmoq yoʻl koʻzdan kechirildi.
Mazkur jarayonda yongʻin, sel kabi ofatlar hamda is gazidan zaharlanishning oldini olish yuzasidan tushuntirishlar berildi.
Shuningdek, ov qurollariga ega 68 nafar shaxsning oʻqotar qurollarni saqlash qoidalariga amal qilishlari oʻrganildi.
Bu yoʻnalishda qonunbuzarlikka yoʻl qoʻygan 14 kishiga nisbatan maʼmuriy bayonnoma rasmiylashtirildi.
Umuman olganda, guruhlar tomonidan bir nafar qidiruvdagi shaxs qoʻlga olinib, 84 ta maʼmuriy huquqbuzarlik aniqlangan, 4 ta jinoyat fosh qilingan.
Tezkor profilaktik tadbirlar davomida ichki ishlar organlarida hisobda turadigan shaxslar, xususan, muqaddam sudlangan 38 nafar hamda probatsiya xizmati nazorati ostida boʻlgan 30 nafar shaxs bilan qayta jinoyatlar sodir etilishining oldini olish nuqtai nazaridan suhbatlar oʻtkazildi.
Shu bilan birga aholi oʻrtasida jinoyatchilikni jilovlash hamda sergaklikni oshirish maqsadida targʻibot tadbirlari uyushtirilgan.
©️ «Postda» gazetasi