Sirdaryodagi tergov hibsxonasida saqlanayotgan shaxslar tibbiy koʻrikdan oʻtkazildi
2024-06-13 15:55:00 / Yangiliklar
Oliy Majlisning Inson huquqlari boʻyicha vakili (ombudsman)ning Sirdaryo viloyatidagi mintaqaviy vakili 8-son tergov hibsxonasiga monitoring tashrifini amalga oshirdi.
Monitoring davomida hibsxonada saqlanayotgan shaxslarning yashash joylari, oshxona, tibbiy yordam koʻrsatish boʻlimi va uzoq muddatli uchrashuv xonalari koʻzdan kechirildi.
Shu kuni mazkur yopiq muassasada saqlanayotgan barcha shaxslar uchun chuqurlashtirilgan tibbiy koʻrik tashkil etildi. Sirdaryo viloyati Sogʻliqni saqlash boshqarmasi koʻmagida tergov hibsxonasiga xirurg, ginekolog, terapevt, psixiatr, okulist, endokrinolog kabi 10 nafarga yaqin tor doiradagi shifokorlar guruhi jalb etildi. Shuningdek, mahkum va mahbuslar ultratovush tekshiruvi (UTT), EKG hamda rentgen uskunalari yordamida tibbiy koʻrikdan oʻtkazildi.
Shu bilan bir qatorda, Ombudsmanning Sirdaryo viloyatidagi mintaqaviy vakili mahbus va mahkumlar bilan yakka tartibda suhbatlashib, muassasadagi sharoitlar boʻyicha fikrlarini oʻrgandi va murojaatlarini qabul qildi.