Buxoro viloyati Ichki ishlar boshqarmasi boshligʻi podpolkovnik Ikromjon Tursunov jismoniy va yuridik shaxslarning murojaatlarini qabul qildi
2024-06-13 15:45:00 / Yangiliklar
Joriy yilning 12-iyun kuni tasdiqlangan reja asosida Buxoro viloyati Ichki ishlar boshqarmasi Jismoniy va yuridik shaxslarning murojaatlarini qabul qilishi xonasida boshqarma boshligʻi podpolkovnik Ikromjon Tursunov tomonidan fuqarolarning sektor va ichki ishlar organlari faoliyati hamda sud-huquq sohasiga doir murojaatlarini qabul qildi.
Qabul jarayonida 30 dan ortiq fuqarolar, yuridik shaxslar va ularning qonuniy vakillari bilan yuzma-yuz muloqot qilinib, surishtiruv va tergov sohasiga doir 13 ta, ichki ishlar organlari xodimlarining xatti-harakatlari bilan bogʻliq 5 ta, sektor faoliyati va boshqa masalalarda qilingan murojaatlari tegishli sohaviy xizmatlar rahbarlari va masʼul xodimlar ishtirokida birma-bir koʻrib chiqildi.
Asosiy eʼtibor, murojaatlarning joyida hal etilishiga qaratilib, qoʻshimcha oʻrganish va qonuniy qaror qabul qilish uchun ish yurituviga olingan murojaatlar yuzasidan aniq va manzilli chora-tadbirlar belgilanib, tegishli sohaviy xizmatlar rahbarlariga bajarish muddatlari aniq belgilangan koʻrsatma va topshiriqlar berildi.
Har bir murojaatning ijrosi alohida nazoratga olinib, murojaatlar yechimi yuzasidan ariza mualliflariga belgilangan muddat va talablar asosida javob xatlarining yuborilishi tushuntirildi.
Bu kabi qabullar orqali aholi bilan doimiy muloqot qilish, fuqarolarni qiynayotgan muammolarni hal etish, odamlarning dardini eshitish, ogʻirini yengil qilish yurtdoshlarimizning adolatga, davlatga boʻlgan ishonchini mustahkamlashga xizmat qiladi.
Buxoro viloyati IIB Axborot xizmati